Nekaturrek batzar nagusia egin du eta Bizkaiko Txakolina 'Nekatur Enbaxadore' izendatu du

Nekaturreko iturriek prentsa ohar bidez jakinarazi dutenez, aurrekoetan bezala, hasteko, topaketak bazkideentzako lan bilera esklusiboa izan du, eta elkartearen barne gaiak landu dira bertan.

Bileraren bigarren zatia prentsari eta agintariei irekia izan da, eta Korrontzi folk musika taldeko Agus Barandiaranek dinamizatu du. Atal honetan, 'Nekaturreko jardunbide egoki jasangarriak' diplomen banaketa eta 'Nekatur Enbaxadorea' aitorpenaren lehenengo edizioa egin dira.

Bada, topaketan azaldu dutenez, landa inguruneko turismoaren jasangarritasunarekin duen konpromisoa nabarmendu dute; Euskadiko landa ostatuetan politika jasangarriak ezartzeko lanean ari da Nekatur bere bazkideekin batera, eta, ildo horretan, 'Jardunbide Egoki Jasangarrien Gida' garatu du.

AITORPENA

Hala, batzar nagusian aitorpen diplomak eman zaizkie gida horretako jarraibideak osatu eta martxan jarri dituzten ostatuei eta urte honetan zehar Hobekuntza Jasangarrirako Ekintza Planean jasotako ekintzak gauzatzen jardun dutenei.

Era berean, 'Nekatur Enbaxadore' izendapen berriaren helburua da beren eguneroko lanarekin Euskadiko landa ostatuaren eta landa ingurunearen eredua dimentsio social, ekonomiko eta jasangarrietan indartzen duten pertsonen lana aitortzea.

Horrela, aurten, Bizkaiko Txakolina Jatorri Deiturak jaso du, ardo berezi hori berreskuratzen, indarrean jartzen eta proiektatzen egindako ibilbideagatik eta Bizkaiko lurraldea, paisaia eta landa nortasuna sustatzen egindako ekarpenagatik.

"Aitorpenak garrantzi berezia hartzen du mahastizaintza eta ardogintza sektoreak Bizkaiko Enoturismoaren sorrerarekin beste urrats estrategiko bat eman duen une honetan. Elkarte honek enoturismoaren garapena sustatzen du landa inguruneko ekonomia, kultura eta turismoa dinamizatzeko tresna bihurtuaz," adierazi dute Nekaturreko arduradunek.