Markos Zapiainek eta Koldo Bigurik irabazi dituzte euskarazko saiakerako eta itzulpengintzako Euskadi sariak

Markos Zapiain eta Koldo Biguri dira euskarazko saiakerako eta itzulpegintzako Euskadi Literatura Sarien irabazleak, Txillardegi hizkuntzalari (Elkar) eta Arturoren uhartea. Ume baten oroitzak (Erein eta Igela) lanei esker.

Era berean, Garazi Albizuak eskuratu du gaztelaniazko literaturako saria Termita (Galaxia Gutenberg) lanarekin, eta Itxaso del Castillok gaztelaniazko saiakerakoa, Mujeres furiosas. El monstruo femenino en el audiovisual de terror (EHU) obrari esker.

Hala jakinarazi du Andoni Iturbe Eusko Jaurlaritzako Kulturako sailburuordeak Gasteizko Montehermoso Kulturunean egindako ekitaldian. Joan den astean iragarritako Unai Elorriagari (euskarazko literatura), Karmele Mitxelenari (euskarazko haur eta gazte literatura) eta Maite Rosenderi (literatur lanen ilustrazioa) gehitu zaizkie hiru irabazle berriak.

Bada, agerraldian azaldu dutenez, Markos Zapianen Txillardegi hizkuntzalari lanari dagokionez, epaimahaiak nabarmendu du bere lana ez dela Txillardegiren inguruan kaleratu diren obren artean bat gehiago, "haien neurria eman dezakeen testua baizik".

BALORAZIOA

"Izan ere, lana eratzen duten atal nagusiek Txillardegiren pentsamenduaren oinarriak azaltzen dituzte, hau da, hizkuntzatasunaz eta euskal hizkuntzaz, eta horien gainean ardazten diren psikologiaz, antropologiaz, soziolinguistikaz edota politikaz, Txillardegiren iturri intelektualak zeintzuk diren argitzen digu Zapiainek", azaldu du epaimahaiak.

Egileak jatorrizko testuak ezagutu eta gerturatzen dituela ere nabarmendu du, prosa zuzen eta didaktikoan, eta "Txillardegiren idatz-esana ulertzeko gakoak" eskaintzen dituela atalez atal.

Horrela, atal bio-bibliografikoak Txillardegiren ideia eta proposamen teorikoetara hurbiltzeko saiakera aberasten duela eta "liburu osoan barrena doan eta hura josten duen hari eroaleari begia" jartzen diola azaldu dute.

"Euskal pentsamenduan aditua izan ala ez, Txillardegik jorratutako hainbat eta hainbat arloetan jakituna izan ala ez, liburua pentsalari eta ekintzailearen obran murgiltzeko gida aproposa izan dakioke irakurleari", zehaztu du epaimahaiak.

Markos Zapiain (Irun, Gipuzkoa, 1963) Filologian lizentziaduna eta Filosofian doktorea da. Batxilergoko irakaslea izan da urtetan, eta komunikabide askotako kolaboratzaile.