Ostarteak gero eta zabalagoak izango dira asteartean

Euskalmet euskal meteorologia agentziaren iragarpenaren arabera, asteartean, irailaren 30ean, goizean goiz oraindik ere behe-hodeiak ugariak izango dira eta euri pixka bat egin dezake iparraldean, baina egunak aurrera egiten duen heinean ostarteak geroz eta zabalagoak izango dira eta giroa aurreko egunetan baino eguzkitsuagoa izango da.

Haizea ahul ibiliko da, eta goizean iparraldetik finkatuko da, eta tenperaturan ez da aldaketa handirik espero. Hiriburuetan, Baionan 13 gradu espero dira gutxienez eta 22 gehienez, Bilbon 15 gutxienez eta 22 gehienez, Donostian 13 gutxienez eta 20 gehienez, Gasteizen 9 gutxienez eta 21 gehienez eta Iruñean 9 gutxienez eta 24 gehienez.

Itsasbazterrean haize aldakorra ibiliko da 2ko indarrarekin, hego-osagaikoa nagusituz, eta eguerdi partean ipar-osagaitik finkatuko da 2-3koarekin; itsaso kizkurra eragingo du, eta egunaren bigarren partean itsaso kizkurra edo itsaskirria. Ipar-mendebaldeko hondoko itsasoak 0,5-1 metro inguruko olatuak altxatuko ditu. Itsasgorak 10:47an eta 23:44an izango dira, eta itsasbehereak 04:23an eta 17:16an. Uraren tenperatura 20 gradukoa da eta ikuspena hamar kilometrotik gorakoa izango da.

BALORAZIOA

Hala, eta ildo horretatik jarraituz, Euskalmetetik azpimarratu duten bezala, "goizean lanbroa eta lainoa sortuko dira. Zerua tarteka hodeitsu egongo da, bereziki goizean goiz eta gauean. Euri txikia egin dezake noizbehinka eta han-hemenka. Norabide aldakorreko haize ahula ibiliko da, eki-osagaia nagusi izanik. Tenperaturan aldaketarik ez".