KARRIKAN ZUBIAKek euskarazko kaleko arteen arloan hasiberriak diren Euskal Herriko artisten sorkuntza eta hedapena sustatzeko 8. deialdia kaleratu du. 2026an sorkuntza-prozesuari ekiteko laguntza ekonomikoa jasoko duen konpainia bat hautatuko da. Horren bidez, ikuskizuna 2027ko Umore Azokan estreinatu ahal izango du, eta KARRIKANeko bazkide eta kide diren jaialdietan bira egin.

Gasteizko Udalak jakinarazi duenez, oinarrietan jasotako irizpideak betetzen dituzten konpainiek urriaren 8ra, asteazkenera, arte aurkez ditzakete proposamenak. Konpainien aurre hautaketa urriaren 24an jakinaraziko da eta Gipuzkoako Dantzagunean (Errenteria), urriaren 30ean finalistekin egingo diren hitzorduetan aukeratuko dute konpainia irabazlea.

KARRIKAN ZUBIAK proiektuak 30.000 eurotik gorako laguntzak jasotzen ditu sorkuntza, prestakuntza, bitartekaritza, komunikazio eta erakusketarako. Horrez gain, bultzada handia emango die kale arteetako konpainiei Euskal Herriko jaialdi eta programazio entzutetsuenetako batzuetan bira egiteko aukera emanda. Izan ere, ikuskizuna erakusteko 10 hitzordu biltzen ditu deialdiak.

Bestalde, Bitsa Konpainia, aurreko edizioan hautatutakoa, bere hurrengo sorkuntza lanean murgilduta dago, eta 2026ko maiatzean estreinatuko da Umore Azokan. Ondoren, urte osoan zehar egingo duen bira hasiko du sarean.

KARRIKAN Euskal Herrian kokatuta dauden eta espazio publikoan testurik gabe edo euskaraz jarduten duten Euskal Herriko talde, artista eta konpainia hasiberrien jatorrizko sorkuntzak babestu nahi dituen plataforma da.

KARRIKANen sartzen dira antzerkia, dantza, zirkua edo formatu txiki edo ertaineko diziplina anitzeko ikuskizunak, sareko bazkideen edo kideen jaialdi eta programazio artistikoetan programatu ahal izateko.

Proiektu honek, bigarren urtez, Akitania Berria-Euskadi-Nafarroa Euroeskualdeko "Euroeskualdeko hiritartasuna" proiektuen deialdiaren babesa jaso du.

Iruñeko Udaleko Kultura Saila eta TOPADA Fabrika, kaleko arteen Iparraldeko fabrika, dira proiektu honetako bazkide berriak, eta, era berean, beste bost bazkide nagusik osatzen dute: Kaldearte Jaialdia (Gasteiz), Kalealdia Jaialdia (Bilbo), 'Le Mai du Théâtre' jaialdia (Hendaia), Umore-Azoka (Leioa) eta Antsoaingo kultur programazioa.

Kide diren beste lau jaialdi eta udalerri ere biltzen ditu: Arrigorriaga, Lezo eta Kalerki jaialdia (Zarautz), eta aurten, gainera, Errenteriako Kultura Kreatiboa gehitu zaie. Eta, azkenik, kide diren hiru egoitza ditu: Gipuzkoako Dantzagunea (Errenteria, Gipuzkoa), Garaion-Sorgingunea (Otatza, Araba) eta Zirkodomoa (Bagatza, Bizkaia).

Deialdiaren oinarriei buruzko informazio guztia KARRIKANen webgunean topa daiteke.