Euskararen garrantzia, laneratzeko orduan

Euskal Herriko Unibertsitateko (EHU) 2021eko promozioko tituludunen %90 lanean ari zen graduko ikasketak amaitu eta hiru urtera, Lanbide enpleguko zerbitzua publikoak euskal unibertsitate publikoko gradudunei buruz egin duen Laneratzeari buruzko azterlana txostenaren ondorioetako baten arabera.

Txostenak euskararen garrantzia ere azpimarratu du laneratzeko orduan: inkestatutakoen %60ri euskara jakitea ezinbestekoa izan zaie lana aurkitzeko unean, edo gutxienez baloratu egin diete.

Ildo horretan, EHUko Ekintzailetza, Enplegagarritasuna eta Transferentziarako zuzendariak txalotu du bi puntu hazi dela euskararen ezagutzaren eskaria laneratzeko orduan, %36tik %38ra.

Jakintza esparruaren arabera, euskararen garrantzia nabarmenagoa izan da gizarte zientzietan (%79,1), humanitateetan (%73,4) eta osasun arloan (%62,7). Beste esparru batzuetan ere inportantea izaten jarraitzen du, nahiz eta ehuneko txikiagoekin: esparru esperimentaletan (%56,7), ekonomiko-juridikoan (%50,2) eta arlo teknikoetan (%35,3).

EHUko iturriek jakinarazi dutenez, 2021ean ikasketak bukatu zituzten 6.627 lagunetatik 4.926ri egin zitzaien inkesta (%75), "emaitza fidagarriak izateko lagin oso esanguratsua, ikasle gehienen egoera islatzen baitu".

Bada, esan bezala, aipatutako promozioaren kasuan, okupazio tasa %90ekoa da, baina generoaren arabera aldea dago: gizonezkoena %91koa den bitartean, emakumeena %89koa da. Gainera, emakumeen %11 langabezian dago, eta gizonen artean %9.

Era berean, ikasketei lotutako enplegu tasa %87koa da, eta lehenbiziko lana lortzeko epea urtebete baino gutxiago izan da ikasleen %63rentzat.

Noemi Peña EHUko Ekintzailetza, Enplegagarritasun eta Transferentziarako zuzendariak adierazi duenez, "gure ikasleak laneratzen laguntzeko, kalitatezko hezkuntza inklusibo eta eleanitzaren alde egiten jarraituko dugu".

"Datuek berresten dute gure graduatuek enplegu tasa altuak dituztela, eta horrek erakusten du gure gradu, master eta titulu propioen eskaintza egokia dela, betiere gizartearen eskaerekin bat etorriz", azaldu du.