Gazte bat atxilotu dute beste bati erasotzeagatik eta hainbat lesio eragiteagatik

Ertzaintzako agenteek 20 urteko gazte bat atxilotu dute gaur Bilbon, buruan eta aurpegian kolpea eman dion beste gizon bati lesioak eragitea egotzita. Zerbitzuz kanpo zegoen ertzain bat erasoaren lekuko izan da, eta biktimari laguntzeko abisua eman du.

Gertakariak goizeko 06:30ean izan dira, Bilboko Miguel de Unamuno plazan. Zerbitzuz kanpo zegoen ertzain batek oihuak entzun ditu, eta gazte baten erasoa ikusi du, lurrera erorarazi ondoren beste bati ostikoka jotzen ari zela. Lekukoak berehala eman du abisua eta esku hartu du. Pertsona batzuk biktimari laguntzera joan dira.

Une horretan, Bilboko Udaltzaingoko patruila bat bertatik zirkulatzen ari zen, eta laguntza eman du aldeak bereizteko eta gertakaria kontrolatzeko. Ertzaintzako beste patruila batek geldialdia egin eta ustezko erasotzailea geldiarazi du. Erasotzaileak alde egin nahi zuen, eta metroko sarrera batera zihoan.

Biktima anbulantzian eraman dute ospitalera, masailezurrean haustura izan dezakeelakoan, eta hainbat hortz-piezari eragin die. Hori dela eta, ertzainek ustezko egilea atxilotu dute, lesio-delitu bat egotzita.

Atxilotua Bilboko Guardiako Epaitegiaren esku utziko dute izapideak amaitzean, Bizkaiko hiriburuko ertzain-etxean.

Bestalde, Ertzaintzako agenteek abenduaren 25ean Zarauzko etxebizitza batean egindako lapurreta baten ustezko egileetako bat atxilotu dute Donostian. Atxiloketaren unean, hainbat ataritan zebilen, eta sarrailak irekitzeko materiala zuen.

Joan den astelehenean, abenduaren 25ean, lapurreta bat gertatu zen Zarauzko etxebizitza batean, eta hainbat bitxi lapurtu zituzten. Dirudienez, lapurretaren irudiak sare sozialetan zabaldu dira eta alarma soziala sortu dute Gipuzkoako udalerri horretan.

Lapurreta-delitu horri zegokion salaketa jaso ondoren, Urola-Kostako ertzain-etxeak ikerketa hasi zuen, eta ustezko egileetako bat identifikatu du. Ostegunean atxilotu zuten, Donostian. Gipuzkoako hiriburuko patruilek Amara auzoko atari eta etxebizitzetan zebilela antzeman zuten gizona. Susmagarriak gel pote huts batean ezkutatuta zituen inpresioning deituriko giltzak, lapurrek sarrailak irekitzeko erabiltzen zuten teknika bat eta faltsututako pasaporte bat.

Atxilotua, 39 urtekoa eta aurrekari polizialak dituena, Donostiako Guardiako Epaitegiaren esku utzi dute gaur.