Bus Elektriko Inteligentearen errekor berria, azaroan zehar ia milioi erdi pertsona garraiatu ditu eta aurten, orain arte (abenduaren 19ra arte) 4.617.385 erabilera bildu ditu. Aurrekaririk gabeko zifra horrek % 45 gainditzen du TUVISAren 2. linea zaharrak 2019an lortutako erregistrorik onena. Aurreikuspenak adierazten du BEIk 2023a 5 milioi pertsona inguru garraiatuta itxiko duela eta aldi horretan atmosferara 1500 CO2 tona emititzea saihestuko duela.
Opor-hilabeteetako erabileraren ohiko jaitsierak izan ezik, aurtengo datuek garapen etengabea izan dute, goranzko joerarekin. Urtarrila 374.508 bidaiarekin itxi bazen, azaroko kopurua 500.000ren langara hurbildu da. Aurreko hilabetera arte, BEIk 2. linearen urterik onenak baino 1.447.419 erabilera gehiago izan ditu eta urrian jada egunean 30.000 pertsona garraiaturen kopurua gainditu zuen.
Garraiatutako pertsonen bolumenari dagokionez TUVISArentzat urte historikoa izaten ari den honetan, zifra horiek erakusten dute BEI dela eragile nagusia. Abenduko datuak kontabilizatu gabe jada 15.230.703 dira autobus-lineen erabilerak eta azarora arte bildutakoak 2019an lortutako errekorra % 3 gainditzen du.
“BEIrentzat nazioarteko errekonozimenduaren urtea izan da. Ikusi dugu beste hiri batzuek nola jarraitzen duten Gasteizek garraiobide berritzailearekin markatutako adibidea. Baina batez ere, egiaztatu dugu hiritarrek egunero egiten dutela Bus Elektriko Inteligentearen alde, mugikortasun jasangarriaren zutabe bilakatzeraino, adierazi du TUVISAren presidente den Iñaki Gurtubaik.
