Baimendu gabeko pintadak garbitzeko kanpaina orain astebete jarri zuten martxan Ariznabarra auzoan eta dagoeneko “bizilagunen zortzi komunitatetako hormetan eta hiri-altzarietan” esku hartu du. “Horietako batzuk izan dira bankuak, paperontziak, farolak edo ibilgailuen birkarga elektrikorako puntuak”, azaldu du Gasteizko alkateak, Maider Etxebarriak.
Era eta neurri askotako pintadetan 82 esku-hartze egin dituzte horiek ezabatzeko lanak urriaren 18an hasi zituztenetik. Lehen lanak Kexaako Gazteluaren kalean egin zituzten. Ordutik, garbiketa-taldeek auzoko kale hauetan egin dituzte lanak: Gaztelako atea, Teodoro Gonzalez de Zarate, Fontetxako Gazteluaren kalea edo Antoniarena plaza.
Azken egunotan, Astulezko Gazteluaren kalearen eta Lantarongo Gazteluaren kalearen artean dauden eraikinetako eta lokal komertzialetako fatxadetan egindako pintadak garbitu dituzte langileek.
Baimendu gabeko pintaden garbiketa kudeatzeaz eta egiteaz gain, Grafitiaren Bulego Birtualak hiritarrentzat zabalik dagoen jazoerak jasotzeko bidea du zabalik. Horretarako, hiritarrek Herritarren postontzia eta oficinavirtualdelgrafiti@vitoria-gasteiz.city posta elektronikoa erabil ditzakete.
"Bulegoa abian jarri zutenetik, hiritarrek egindako eskaeraren ondorioz 36 jazoera ireki dituzte (hiriko 15 auzotakoak). Hala, auzo hauetatik jasotako eskariak nabarmendu behar dira: Ariznabarra (9), Arriaga-Lakua (8), Babesgabetuak (3) eta Zabalgana (3). Dena den, beste barruti batzuetatik ere iritsi dira eskaerak: Alde Zaharra, Zabalgunea, Sansomendi, San Martin edo Arantzabelatik, adibidez", azpimarratu zuten Gasteizko Udaletik.
"Gainera, bide horretatik bertatik bi horma-irudi ez garbitzeko eskatzen duten bi mezu jaso dituzte: lehenengoa Teodoro Gonzalez de Zarate kaleko 6 eta 12 zenbakien artean dagoen horma-irudia da, Baskonia jokalariei eskainitakoa, eta Udalaren baimena duena; bestea, aldiz, Lantarongo Gazteluaren kaleko lokal batean dagoen grafitia da".
