Pasaia, labanarekin mehatxatuta taxilari bati lapurreta egiten saiatzeagatik atxilotu dute

Ertzaintzan jarritako salaketaren arabera, goizaldeko bostak baino lehentxeago taxilari batek bezero bat hartu du Donostiako Herrerako geltokiaren ondoan. Bezeroa autoaren atzeko aldean eseri da eta Pasai Antxora, autobusaren azken geltokira, eramateko esan dio. Eskalantegi kalera iristean, taxilariari eskatu dio Axular plazan dagoen aparkalekura eramateko. Iritsi direnean, eta bidaiaren prezioa esan dionean, bezeroak labana erakutsi dio eta buru atzean jarri dio, taxian zeraman diru guztia emateko esanez. Taxilaria jiratu egin da eta biak elkarren aurka indarka hasi dira, eta ustezko lapurrak ebakiak egin dizkio esku batean. Horretan ari zirenean, autoa ustekabean mugitu da, eta bertan aparkatuta zegon beste auto bat jo du. Une horretan, lapurrak korrika ihes egin du.

Hala, eta ildo horretatik jarraituz, Eusko Jaurlaritzaren Segurtasun sailetik azaldu dutenez, "Inguruan zebilen Pasaiako Udaltzaingoaren patruila batek ikusi du pertsona bat korrika ihesi, eta beste pertsona batzuek esan diote ustez lapurreta batean inplikatuta zegoela".  "Hamarretxeta kalearen parean geldiarazi ahal izan dute gizona, eta auto baten azpian labana bat aurkitu dute, lapurretaren berri eman dieten pertsonek emandako informazioari jarraituz. Adierazitako lekura Ertzaintzaren dotazioak agertu dira, eta gizona taxilariari lapurreta egiten saiatu dela egiaztatu ondoren, atxilotu eta Errenteriako Ertzain-etxera eraman dute. Taxilariak osasun-laguntza behar izan du ebakiak sendatzeko".

Atxilotua agintari judizialaren eskuetan jarriko dute polizia-izapideak amaitzean.