Errespetuzko elkarbizikitza akustikoa sustatzeko kanpaina abiarazi du Donostiako Udalak

Donostiako Udalak zarataren inguruan sentsibilizatzeko beste kanpaina bat jarri du martxan Errespetuzko bizikidetza akustikoa lelopean, atsedena, ongizatea eta herritarren arteko errespetuan oinarritutako bizikidetza sustatzen duten ohiturak bultzatzeko helburuarekin.

Udal arduradunek aurkezpenean azaldu dutenez, kanpainak eguneroko bizitzako hiru eremutan jarriko du arreta, kutsadura akustikoa gutxitzeko norbanakoaren portaera bereziki garrantzitsua den eremuetan, hain zuzen ere.

Horrela, alde batetik, aisialdia eta espazio publikoaren erabilerari dagokionez, kaleez eta plazez gozatzea eta auzokoek atseden hartzea bateragarri egingo dituzten jarrera arduratsuak sustatuko dira. Garraioaren eremuan, bestetik, mugikortasunak sortutako zarata murrizten lagunduko duten ohiturak bultzatuko dira, eta 'Soinu-oasi' izeneko eremuan, hondartza edota parke publikoetan pertsona guztientzako lasaitasun eta errespetu giroa egon dadin sustatuko da.

Iñigo Garcia Ingurumeneko zinegotziak adierazi duenez, "datuek berresten dute Donostia posizio onean dagoela kalitate akustikoari dagokionez, gure inguruko beste hiri batzuekin alderatuta. Hala ere, hori ez da helmuga bat, baizik eta erreferentzia bat, bizikidetza eta bizi kalitatea hobetzen jarraitzeko lanean jarraitzera behartzen gaituena".

Kanpaina Gipuzkoako Ostalaritza Elkartearekin, Dbusekin eta kale garbiketako zerbitzuekin lankidetzan egin da, eta kutsadura akustikoa murrizteko eta hiriko ingurumen kalitatea hobetzeko udal estrategiaren parte da.

Esparru horretan sartzen dira, besteak beste, zarataren eta bibrazioen aurkako udal ordenantza berria onestea, zarataren mapa estrategikoa egitea, zarataren aurkako ekintza plana egitea, isuri gutxiko eremua ezartzea, bizikleta sarea handitzea, Dbuseko flota eta garbiketa ibilgailuak pixkanaka elektrifikatzea, kale askotan abiadura 30 km/h-ra murriztea, edo jarduera ekonomikoen eta herritarren atsedenari eragin diezaioketen portaeren gaineko kontrola indartzea.