'Abestu Euskadiko Orkestrarekin' ekimenaren hirugarren edizioak 132 ahotsak ditu jada

'Abestu Euskadiko Orkestrarekin' ekimenak bildu ditu dagoeneko hirugarren edizioan pate hartuko duten 132 abeslari ez-profesionalak, Iruñeko Baluarten, Euskalduna Bilbaon eta Donostiako Kursaalean orkestrarekin batera aritzeko azaroaren 24tik 27ra. Entseguak irailaren 16an hasiko dira eta bi hilabetez luzatuko dira.

Euskadiko Orkestrak jakinarazi duenez, ekainaren 10ean ireki zen proiektuaren hirugarren edizioan izena emateko epea, eta baldintza bakarra gutxieneko musika-prestakuntza izatea eta partiturak irakurtzen jakitea zen. Izena emandako ehunka ahotsetatik 132 aukeratu ahal izateko, zozketa publikoa egin zen Miramonen ostegunean, ekainaren 25ean, eta emaitzak dagoeneko ikusgai daude https://view.publitas.com/orquesta-de-euskadi-sa/abestu_3_zo... estekan.

Zozketan 34 soprano, 32 kontralto, 32 tenor eta 34 baxu aukeratu dira. Gainera, adin tarte eta jatorri desberdinen presentzia ahalik eta orekatuena bilatu da, eta horretarako taldez taldekako zozketa egin da, ahots mota, lurralde eta adin taldearen arabera, alegia.

Hautatutako 132 ahotsak 66 ahotseko bi abesbatzatan banatu dira, 'A abesbatza' eta 'B abesbatza' izenekoak, kontzertu sinfonikoetan antolaketa, logistika eta banaketa errazteko. 'A abesbatza' Gipuzkoa eta Nafarroako ahotsez osatuta dago, eta Baluarteko kontzertuan eta Kursaaleko lehenengoan parte hartuko du. 'B abesbatza' Bizkaiko eta Arabako ahotsek osatzen dute, eta Euskaldunako kontzertuan eta Kursaaleko bigarrenean parte hartuko du, ondorioztatu dute bertatik.