Burdinbidearen Euskal Museoak lurrunezko hiru tren jarriko ditu martxan asteburuan

Hain zuzen ere, Euskotrenek prentsa ohar bidez jakinarazi duenez, lurrunezko trenek Azpeitiko instalazioetatik Lasaora arteko bidaia egingo dute, 12:00etan eta 17:30ean irtenda larunbatean, maiatzaren 23an, eta 12:00etan igandean, maiatzaren 24an.

Burdinbidearen Euskal Museoak Europako trenbide bildumarik onenetakoa du ikusgai bere instalazioetan, mota guztietako ibilgailuekin: lurrunezko tren makinak, dieselak zein elektrikoak, automotoreak eta hainbat motako bagoiak.

Era berean, Euskadiko makina-erreminta multzo osatuenetakoa eskaintzen du, Urolako Trenbidearen tailer mekaniko zaharraren bidez, eta XIX. mendearen amaieratik trenbidean erabilitako uniformeen laginak ditu, baita munduko tren erlojuen bildumarik onenetakoak ere.

Burdinbidearen Euskal Museoa 10:00etatik 13:30era eta 15:00etatik 18:30era dago zabalik asteartetik ostiralera (lanegunetan), 10:30etik 14:00etara eta 16:00etatik 19:30era larunbatetan, eta 10:30etik 14:00etara igande eta jaiegunetan (astelehenetan izan ezik).

Beste gai batzuekin jarraituz,

Arabako Foru Aldundiak eta Euskaltzaindiak sustatzen duten 'Euskararen Biziberritzea Araban (EBA)' egitasmoa Udaltop Udaletako Euskara Zerbitzuen Topaketaren 28. edizioan aurkeztuko da. Topaketa Lasarte-Orian (Gipuzkoa) izango da, ostegunean eta ostiralean, maiatzaren 21ean eta 22an, Manuel Lekuona Kultur Etxean.

Euskaltzaindiko iturriek jakinarazi dutenez, aurtengo aldian, justizia linguistikoa izango da hizpide, eta, bi egunetan, justizia linguistikoa ikuspegi filosofiko eta politikotik lantzeko ahalegina egiteaz gaiz, hizkuntza gutxituak indarberritzeko oinarriez hitz egingo da.

Bada, EBA proiektuaren aurkezpena ostiralean izango da, maiatzaren 22an, 10:00etan, eta Iñaki Martinez de Luna eta Irati Iciar Euskaltzaindiaren Sustapen Batzordeko kide eta EBA proiektuko koordinatzaileak parte hartuko dute.