Udaberriko Bertso Saioak itzuliko dira maiatzean Santutxuko Karmelo plazara, Bilbon

Bilboko Udalak eta Santutxuko Bertso Eskolak Udaberriko Bertso Saioak antolatu dituzte berriro udaberri honetarako, eta hiru bertso saio izango dira Santutxuko Karmelo plazan maiatzaren 9, 23 eta 30ean. Gainera, hilaren 15ean ohiko bertso poteoa egingo da.

Antolatzaileek jakinarazi dutenez, Udaberriko Bertso Saioen 42. edizioa da aurtengoa, eta "euskaltzaleentzako topagune" bihurtu da jada, Santutxuko Bertso Eskolak egiten duen lana babesteaz gain, Bilboko 2023-2033 Kultura Plan Estrategikoan jasotako helburuetako bat baita.

Edizio berrian 14 bertsolarik hartuko dute parte, zazpina emakume eta gizon, lau belaunalditako ordezkariak. Bertsolari beteranoena Unai Iturriaga da (Durango, Bizkaia, 1974), 20 urte baino gehiago daramatza Santutxun parte hartzen, eta gazteena Haira Aizpurua (Sara, Lapurdi, 2006), aurten lehen aldiz arituko dena.

Hain zuzen, 2026ko Udaberriko Bertso Saioak Bizkaiko eta Lapurdiko bertsolarien arteko topaketak izango dira, hamar bizkaitarrekin (Oihana Bartra, Aissa Intxausti, Unai Iturriaga, Nerea Ibarzabal, Jone Uria, Aitor Etxebarriazarraga, Onintza Enbeita, Txaber Altube, Ibaia Amillategi eta Unai Mendiburu) eta lau lapurtarrekin (Amets Arzallus, Aitor Servier, Maddi Ane Txoperena eta Haira Aizpurua).

Aitor Etxebarriazarraga eta Maddi Ane Txoperena ere bertan izango dira, Bizkaiko eta Iparraldeko azken txapeldunak, hurrenez hurren. Gainera, parte hartzaileen artean Bizkaiko azken Bertsolari Txapelketako bost finalista daude.

Santutxuko Bertso Eskola arduratuko da saio bakoitzean gaiak proposatzeaz. Horretarako, Irati Erkizia, Urtzi Urrutikoetxea eta Aitor Irastortza ariko dira aurkezpen lanak egiten eta bertsolari bakoitzari txanda ematen.

Ohiko bertso poteoa maiatzaren 15ean egingo da, eta 20:00etan hasiko da Karmelo kaleko 7 zenbakian, Amets Arzallusen eta Unai Iturriagaren partaidetzarekin eta Iker Uribarrenek gidatuta. Karmelo kaleaz gain, Ricardo Bastida plaza eta Arsuaga kalea zeharkatuko ditu, lau geraldiekin.

Berrikuntza gisa, aurten Karmelo plazan eserlekuak eta lekuak erreserbatu dira, mugikortasun murriztua edo premia bereziak dituzten pertsonentzat. Erreserba bertso saioak hasi baino 15 minutu lehenago egin daiteke.