Aranzazu Calleja musikagileak jasoko du Bilboko 32. FANT zinemaldiaren Ohorezko FANT Saria

Bilboko Udalak antolatzen duen FANT Zinema Fantastikoaren JaialdiakAranzazu Calleja musikagile bilbotarrari emango dio 32. edizioko Ohorezko FANT Saria, tokiko talentua ikusarazteko eta laguntzeko apustuan, "gaur egungo musika zinematografikoaren sortzaile nabarmenetakoa" izateagatik. FANT jaialdiamaiatzaren 8tik 16ra egingo da.

Zinemaldiaren antolatzaileek jakinarazi dutenez, Callejak ibilbide luzea egin du jada zinemarako musikagintzan, eta bere lanen artean, 'El hoyo', 'Cinco Lobitos', 'Marco', 'Irati' edo 'Akelarre' bezalako filmak nabarmentzen dira; azken lan horrengatik jatorrizko musika onenaren Goya eta Platino sariak jaso zituen Maite Arroitajauregirekin batera.

Bere proiektu berrienetan musika jarri die Borja Cobeagaren 'Los aitas', Jose Mari Goenaga eta Aitor Arregiren 'Maspalomas' (Goya eta Feroz sarietarako izendatua jatorrizko musika onenaren atalean) eta Paul Urkijo Alijoren 'Gaua' filmei. Egun, Norma Vila zuzendari bilbotarraren 'Salitre' lehen filmaren soinu bandan murgilduta dago.

Bestalde, antolakuntzak jakinarazi du Luis Calderonek zuzendutako 'La Casa en el Árbol' filmaren proiekzioarekin hasiko dela 32. FANT, maiatzaren 8an. Bizkaiko hainbat lekutan filmatu da lana Bilbao Bizkaia Film Commission erakundearen laguntzarekin, eta "ikusmin handia" sortu du, 'Fotogramas' aldizkariak 2026ko ekoizpen esperotakoenen artean aukeratu ondoren.

"Nortasun bisual eta emozional nabarmena" duen slasher generoko egile filma da, eta Sandra Escacena, Claudio Portalo, Kandido Uranga, Mala Rodriguez, Apolonia Lapiedra, Ai-xing Cobos, Asier Hernández eta Inge Ugarte ditu protagonista.