'Hauspoa & Tunela' dokumentala estreinatuko da urtarrilaren 30ean Bilboko Bidebarrieta Kulturgunean

Hauspoa & Tunela dokumentalaren estreinaldia egingo dute Bilboko Udaleko Bidebarrieta Kulturguneko Areto Nagusian urtarrilaren 30ean, eta Iñaki Pinedo eta Gorka Hermosa lanaren gidoilari eta zuzendariak bertaratuko dira lanaren xehetasunak azaltzera.

Bilboko Udaletik iragarri dutenez, haiekin batera, Toti Martinez de Lezea idazlea eta Kepa Junkera musikaria izango dira. Laurak izango dira proiekzioa bukatu ondoren egingo den solasaldiaren protagonistak. Ekitaldia 19:00etan hasiko da, eta bertaratu nahi dutenek Bilbao Kulturaren webgunean dute eskuragarri gonbidapenen erreserba.

'Hauspoa & Tunela' dokumentalak kontatzen du nola 1859an, Madril-Paris trenbideko obrei esker, italiar langile batek jotako akordeoi txiki bat iritsi zen Zumarragara (Gipuzkoa), musika ezezagun horiek inguruko panderetera tradizionalen antzinako soinuarekin uztartzea ahalbidetu zuen hazia.

Italiar hura (Juan Bautista Busca) bizi izan zen etxetik metro gutxira, 1920an, Euxebio tabernan, lehen trikitixa talde egonkor ezaguna sortu zen: Zumarragako Trikitixa, gaur egun ere jardunean jarraitzen duena, eta 1924an trikitixaren lehen diskoa grabatu zuena (Columbia Records diskotxearekin).

Dokumentalean, akordeoiak Zumarragatik mundu osoko entzungelarik ospetsuenetara (Berlingo Filarmonikara, kasu) iristeko izan duen eboluzioa ere aztertzen da.

Hauspoa & Tunela filmak pertsonaia handien testigantzak jasotzen ditu, hala nola Fermin Muguruza, Bernardo Atxaga, Kepa Junkera, Joseba Tapia, Jon Maia, Toti Martinez de Lezea, Garikoitz Mendizabal, Jon Plazaola, Joseba Apaolaza eta jardunean den Zumarragako Trikitixako kideena.