Bergarako Laboratorium Zientzia Museoak 'Mundua aldatu zuten eta aldatzen duten emakumeak' erakusketa ireki du

Bergarako (Gipuzkoa) Laboratorium Zientzia Museoak Mundua aldatu zuten eta aldatzen duten emakumeak izenburuko erakusketa hartuko du otsailaren 15era bitarte. Euskadiko Parke Teknologikoak sustatutako erakusketa da, eta Emakumeak Zientzian ekimenaren barruan antolatu da, museoak Emakume eta Neska Zientzilarien Nazioarteko Egunaren inguruan antolatu dituen gainontzeko ekintzekin batera.

Laboratorium museotik jakinarazi dutenez, erakusketak zientziaren eta teknologiaren historiako zein egungo emakume erreferenteak jartzen ditu erdigunean, emakumeek gizartearen aurrerapenean egindako ekarpenei ikusgaitasuna emanez. Iragana eta oraina uztartzen dituen ibilbide baten bidez, "askotan ikusezin bihurtu diren lanak balioan jarri eta belaunaldi berrientzat erreferenteak sortzea" du xede.

Erakusketa bi ataletan egituratu da. Alde batetik, Mundua aldatu zuten emakumeak atalak zientzia eta teknologiaren historian mugarri izan diren emakumeen lana jasotzen du; bestetik, 'Mundua aldatzen duten emakumeak' atalak gaur egun arlo horietan lanean ari diren profesionalen ekarpena nabarmentzen du.

Rosa Errazkin Laboratoriumeko zuzendariaren hitzetan, erakusketa hau "Laboratoriumek berdintasunarekin, dibulgazio zientifikoarekin eta hezkuntzarekin duen konpromisoaren erakusle da".

Emakumeek zientzian iraganean eta egun egiten duten ekarpenari ikusgaitasuna ematea ezinbestekoa dela azpimarratu du, eta ildo beretik doaz Emakume eta Neska Zientzialarien Nazioarteko Egunaren harira antolatutako gainerako ekintzak.

Erakusketarekin batera, urtero bezala, Laboratoriumek Emakume Zientzialarien IV. Lehiaketa antolatu du Lehen Hezkuntzako 5. eta 6. mailako ikasleentzat. Lehiaketaren helburuak emakume zientzialarien erreferenteak ezagutaraztea, zientziarekiko interesa piztea eta genero arrakala murrizten laguntzea dira. Lanak urtarrilaren 31ra arte aurkeztu ahal izango dira, eta sari banaketa otsailaren 11n egingo da museoan bertan.