Donostiako Udalak ia 822.000 euro inbertitu ditu Pakea eta Altzaerreka erreketan eusteko urmael bana egiteko

Donostiako Udalak eusteko urmael banaren eraikuntza amaitu du Miramongo basoan dauden Pakea eta Altzaerreka erreketan. Obraren aurrekontua 821.800,57 eurokoa izan da, BEZ barne, eta aurreikusitakoa baino egikaritze epe laburragoa izan du, bost hilabetetik hirura pasatuz. Hiriko drainatze sistema naturalaren funtsezko guneak dira, eta esku hartzearen helburuak izan dira Amara auzoaren uholde arriskua murriztea eta Urumea ibaira isurtzen den uraren kalitatea hobetzea.

Girder Ingenieros enpresak idatzi zuen proiektua, Hiri Mantentze eta Zerbitzuetako Zuzendaritzak eskatuta, eta 'Ibai-ekosistemak lehengoratzeko eta hiri-inguruneetan uholde-arriskua murrizteko jarduketak' estrategiaren parte da. Estrategia hori 2022an hautatu zen, Trantsizio Ekologikorako eta Erronka Demografikorako Ministerioaren Biodibertsitate Fundazioaren laguntzen barruan, NextGeneration EU Europako funtsekin finantzatuta.

Carlos Garcia Hiri Mantentze eta Zerbitzuetako zinegotziak azaldu bezala, "jarduketa horrekin bi helburu lortu nahi izan dira: alde batetik, uraldiak geruzetan banatzea, euri jasen pareko aldi bihurtuz, kolektoreen edukiera gaindi ez dadin eta Amaran uholderik sor ez dadin, eta, bestetik, Urumeara iristen den ur bolumena murriztea eta ur horren kalitatea hobetzea, era horretan, ibaiaren ingurumena babesten laguntzeko".

PARKEA

Pakea errekan egindako euste-urmaelak 480 metro kubikoko gehieneko edukiera du. Oinezkoen pasabide batetik ibaian behera dago, erreka GI-20 errepidearen azpian lurperatu baino lehen. Paisaiari dagokionez, harri lubeta begetatuaren bidez dago integratuta, eta ohiko emari ekologikoa igarotzea ahalbidetzen du. Eurite handiak daudenean baino ez da kargatuko, puntako ur emariei eusteko; horrela, uraldiak kontrolatu ahal izango dira, oinezkoen pasabidea urez bete ez dadin.

Altzaerreka errekaren kasuan, edukiera handiagoko urmaela sortu da: gehienez ere 901 metro kubikoko euste bolumena du. Miramongo errepideko azpiko lurperatzetik ibaian gora dago, eta uraldiei eusteko diseinatuta dago, bidegorria eta inguruko eremuak babesteko. Pakean bezala, natura-ingurunean integratu da, inpaktu txikiko eta landaredi biziko eraikuntza soluzioen bidez.

Bi jarduketek ur mailaren sentsoreak dituzte, erreken portaera hidraulikoa etengabe kontrolatzeko. Jarduketak hiri basoaren ingurunea zorrotz errespetatuz egin dira, eta makineria astuna erabiltzeko orduan mugak ezarri dira, dagoen landarediari kalterik ez egiteko.