Uhinak biltzarraren 7. edizioa 2026ko urriaren 8an eta 9an egingo da Ficoban

Irungo Ficoba erakusketa guneak eta AZTI teknologia zentroak sustatutako Uhinak Mugaz Gaindiko Klima eta Kosta Aldaketaren Biltzarraren zazpigarren edizioa 2026ko urriaren 8an eta 9an egingo da. Hain zuzen, topaketaren batzorde teknikoak bilera egin du aste honetan Ficoban bertan, datorren urteko berrikuntza nagusiak aztertzeko.

Bada, Ficobatik jakinarazi dutenez, "bere ikuspegi globalean leial, non foro berean biltzen diren komunitate zientifikoa, administrazio publikoak eta enpresak, Uhinak pauso bat gehiago eman du bere izaera praktikoa eta kostaldeko erronkei aurre egiteko erabakietan duen erabilgarritasuna indartzeko".

"Klima krisiak erantzun koordinatuak eskatzen ditu, eta 2026ko edizioak formatuaren aldaketa bat aurkezten du, esperientzia errealen trukea errazteko eta aurkezten diren soluzioen aplikagarritasuna handitzeko diseinatua", iragarri dute.

Horrela, berrikuntza nagusitzat, Uhinak biltzarraren bigarren egunean bi mahai inguru berezi izango dira udalek eta udalerriek parte har dezaten. Kostaldeko herriek aurre egin behar dieten erronkak eta lurralde desberdinetan klima errealitate berrira egokitzeko martxan jarritako ekintzak aztertuko dira mahaiotan.

Ekimen honekin, Uhinak biltzarrak tokiko administrazioek parte hartzea indartu nahi du, "klima aldaketara egokitzearen giltzarri diren eragileak" direlako.

Era berean, biltzarraren batzorde teknikoak berretsi du urtarrilean irekiko dela 'call for abstracts', ikerketa komunitatea, administrazioak eta enpresak ekarpenak aurkeztera gonbidatuz, "erabilgarria, zorrotza eta ekintzan orientatua den programa bat eraikitzeko". Zehazki, 'call for abstracts' 2026ko urtarrilaren 11n abiatuko da, eta aurkezpenak jasotzeko azken eguna apirilaren 21a izango da.