CAF konpainiak beste kontratu bat eskuratu du Frantzian eta, horrekin, herrialdeko tren merkatuan duen presentzia "sendotu" du. Kontratu berriaren zenbatekoa 250 milioi euro ingurukoa da, eta euskal enpresak 22 Régiolis eskualde mailako tren hornituko dizkio SNCF Voyageurs operadoreari Sud eskualderako (Proventza-Alpeak-Kosta Urdina).
Horrela, CAFek nabarmendu duenez, eskualdeko tren zerbitzuak operatzeaz arduratzen den SNCF Voyageurs enpresak "CAF-Alstom partzuergoan jarritako konfiantza berrituko du eskualdeko trenen eskari berri honekin".
Aurretik Sud eskualdeak eskuratutako 17 treneko flota osatu eta gaur egun Marseilla-Aubanha-Toulon-Hyères eta Marseilla-Toulon-Les Arcs Draguignan lineetan funtzionamenduan dauden unitateak ordezkatuko ditu material berriak.
CAFek diseinatu eta fabrikatuko ditu trenak Alsaziako Reichshoffen lantegian, eta Alstom arduratuko da unitaterako zenbait ekipo hornitzeaz. Régiolis eskualde mailako tren elektrikoak dira, sei kotxekoak, eta 310 bidaiarirentzako edukiera dute.
Hala, eta ildo horretatik jarraituz, trenek erosotasun handia eskaintzen diete bidaiariei, leihate handiak, led motako zeharkako barne argiztapena eta eserleku erosoak baitituzte, irakurtzeko argiekin eta korronte harguneekin. Gainera, mugikortasun murriztua duten bidaiarientzat erreserbatutako espazioak dituzte.
Era berean, tren unitateek TSI 2023 arauak beteko dituzte; arau horiek zorrotzagoak dira ke eta su isurien arloko eskakizunei eta erabilitako materialei dagokienez, ondorioztatu dutenez.
