Bizkaiko 25 jatetxek menua eskainiko diete aste honetan nahi gabeko bakardade egoeran dauden 100 pertsonari

Bisubi Bizkaiko Sukaldarien Bilkura Fundazioak eta BBK banku fundazioak 'Utopia Isila Week' ekimena abiatu dute aste honetan, Caritas Bizkaiaren laguntzarekin, eta Bisubi sareko 25 jatetxek beren menua eskainiko diete nahi gabeko bakardade egoeran dauden 100 pertsonari ostiralera arte.

Proiektuaren xehetasunak astearte honetan aurkeztu dituzte prentsaurrekoan Koldo Bilbao BBK-ko Kultura eta Pertsonen arduradunak, Lara Martin Bisubi Fundazioko presidenteak eta Idoia Perez de Mendiola Bizkaiko Caritaseko esku hartze arduradun eta zuzendaritza taldeko kideak.

Horrela, azaldu dute Utopia Isila Weekegitasmoak "estigmak apurtzea" eta "kolektibo ahulei duintasuna itzultzea" dituela helburu, jatetxe batean "sukaldaritzako esperientzia intimo eta zaindu batez gozatzeko aukera" eskainiz.

Proiektua "duintzeko, estigmak kentzeko eta gizarte kohesioa bultzatzeko" sortu da, eta dagoeneko Zarate, Mina edo Aitaren bezalako jatetxe esanguratsuetan bizi izan ditu bere lehen esperientziak.

Modu honetan, Bisubi sareko 25 jatetxek Caritasek aukeratutako 100 pertsona hartuko dituzte, eta ohiko zerbitzuko mahaietan eseriko dira menu zaindu batez gozatzeko, edozein bezerok jasotzen duen profesionaltasun eta arreta berberaz.

Bilbon, Bikandi Etxea, La Taberna de Zarate, Los Fueros, Guruzu, Dustuarrak, Kimtxu, Lurrina, Solo Gastrotraska, Damajuana, La Olla (Plaza Nueva), La Roca, Bascook, San Telmo eta Monocromo jatetxeek egin dute bat ekimenarekin.

Ezkerraldean, Sikera eta La Oficina STZ jatetxeetan burutuko da, Enkarterrin Teike eta Skamata jatetxeetan, Busturialdea-Lea Artibain Zallo Barri eta Alakrana jatetxeetan, Uribe-Txorierrin Haritza, Taberna Mikel Bengoa eta Brutal Gastro Bar jatetxeetan, eta Duralgaldea-Arratia Botafumeiro jatetxean.