Ertzaintzak emakume bat atxilotu du duela gutxi Barakaldoko (Bizkaia) etxebizitza batean izandako sutean ustez inplikatuta dagoelakoan. Sutean lau gizon zauritu ziren, eta horietako bat hil egin zen hirugarren solairutik amildu ondoren, Eusko Jaurlaritzako Segurtasun Sailak jakinarazi duenez.
Sutea azaroaren 13an gertatu zen, 06:00ak baino minutu batzuk lehenago, Barakaldoko Carmen kaleko etxebizitza bloke bateko hirugarren solairuan. Ertzaintzak hainbat dei jaso zituen sutan zegoen etxebizitza bateko bizilagunek leihoetatik laguntza eskatzen zutela ohartaraziz.
Larrialdietako zerbitzuak iritsi zirenean, "egiaztatu zuten etxeko bizilagunetako bat amildu eta kalera erori zela, eta beste bik leihoetatik laguntza eskatzen jarraitzen zutela. Suhiltzaileek bi pertsona horiek erreskatatzea lortu zuten, eta beste bat barruko patiotik atera zuten", azpimarratu dute Eusko Jaurlaritzaren Segurtasun sailetik.
Etxebizitzan bizi ziren 46 eta 60 urte bitarteko lau pertsonak lekuan bertan artatu zituzten osasun zerbitzuek, eta, ondoren, Gurutzeta eta San Eloy ospitaleetara eraman. Handik ordu batzuetara, kalera amildu zen 48 urteko gizona hil egin zen zaurien larritasunaren ondorioz.
EUSKO JAURLARITZAREN BALORAZIOA
Une horretatik aurrera, Ertzaintza sutearen arrazoiak ikertzen hasi zen, hipotesi gisa hartuta nahita eragindakoa izan zela. Ikerketa Sestaoko ertzain-etxetik egin dute, eta 44 urteko emakume bat atxilotu zuten asteartean Barakaldon egitateekin ustez zerikusia duelakoan.
Atxilotua polizia egoitzara eraman zuten eginbideekin jarraitzeko, eta, horiek amaitu ondoren, agintari judizialaren eskuetan jarriko dute. Ertzaintzak ikertzen jarraitzen du.
