BBK Salak irailean estreinatuko du 'R&J' bederatzigarren ekoizpen propioa

Bilboko BBK Salak estreinatzeko prest du R&J bere bederatzigarren ekoizpen propioa, La Dramática Errante konpainiarekin elkarlanean. William Shakespearen 'Romeo eta Julieta' klasikoaren berrikuspen garaikidea da, eta Kale Nagusiko aretoan ikusi ahal izango da irailaren 27an eta 28an euskaraz, eta urriaren 3tik 5era gaztelaniaz.

Maria Goiricelayaren zuzendaritzapean, Ane Pikaza, Aitor Borobia, Egoitz Sanchez, Nagore Gonzalez eta Luix Mitxelena aktoreak izango dira oholtza gainean. Sarrerak salgai daude jada, 12 euroan, BBK Salaren webgunean eta leihatilan.

Sortzaileek azaldu dutenez, "literatura unibertsaleko erromantze ospetsuenetik abiatuta, maitasunari buruz ere hausnartu nahi dugu, baina gaur egun, emozioen arintasuna, sare sozialak eta askotariko loturak nagusi diren garaiotan".

R&J BBK Salaren bederatzigarren ekoizpen propioa da dagoeneko, eta aurkezpenean izan den Nora Sarasola BBK-ko Gizarte Ekintzako zuzendariak nabarmendu duenez, hori lortu da 2021ean aretoak apustua egin zuelako "proiektu artistiko eraldatzaile eta kalitatezkoen" eszenatoki izateko eta proiektu horiek sortzen laguntzeko.

"BBK Banku Fundaziotik gure erkidegoaren hausnarketa eta kohesioa bultzatzen duen gizarte aldaketaren eragile gisa ulertzen dugu kultura. Eta honelako proposamen bat guztiz bat dator ikuspegi horrekin", gaineratu du.

Hain zuzen ere, BBK Salaren lehen ekoizpena Yerma izan zen, duela lau urte, hori ere La Dramática Errante taldearekin lankidetzan. Antzezlanak 80 emanaldi baino gehiago izan zituen Espainiako Estatuan zehar, eta Max saria jaso zuen antzerkirako moldaketa edo bertsio onenaren atalean.

IKUSKIZUNAK

BBK Salatik sortutako hurrengo ikuskizunek ere "ibilbide emankorra" izan dute: Borderland ganbera-opera Madrilgo Fernán Gómez Antzokian programatu zen, ¡Agur, Otxoa feroz! Bizkaiko hainbat lekutan izan da, eta Yarin dantza-pieza Europa eta Amerikako antzokietan ere ikusi da.

R&J hirugarren ekoizpen propioa da 2025ean, Cinco golondrinas eta Confeti. Itzulera lanen ostean, eta bere estreinaldiarekin, BBK Salak "bertoko sorkuntza artistikoarekin eta berritzailearekin duen konpromisoa" berretsi du, Sarasolak ziurtatu duenez.