Hilerria egungo beharretara eta etorkizuneko erronketara egokitzeko prozesua hasi du Bilboko Udalak

Bilbao Zerbitzuak udal erakundeak hilerriaren araudi berria egiteko prozesua hasi du, espazioa egungo beharrizan sozialetara eta etorkizuneko erronketara egokitzeko, "zerbitzu gizatiarragoa, digitalagoa eta iraunkorragoa, kudeaketa eraginkorrago, gardenago eta herritarren egungo beharretara egokitutakoaren bidez".

Alvaro Perez Bilboko Udaleko Osasun eta Kontsumo zinegotziak azaldu duenez, "2012tik indarrean dagoena ordezkatzera datorren erregelamendu honen azken helburua hildakoei eta haien senideei arreta erraztea eta hobetzea da, baita bere erabilerak berritzea ere, heriotzari buruzko tratamenduaren pentsamoldea aldatzen lagunduz".

Araudi berriak errealitate eta behar berri batzuei erantzungo die, hala nola errausketen gorakadari, etxeko animaliei hileta zerbitzuak eskaintzeko aukerari, kolektibo erlijiosoak ehorzteko guneak erreserbatzeari, heriotza perinatalaren tratamendu sentikorrari, edo familiei laguntza eta arreta integrala emateari.

Perezek esan du ez da eguneraketa txiki bat, "hirirako ekimen estrategiko nagusi bat baizik". "Bilboko Udalaren hilerrien araudi berriak arautegi hutsetik haratago doan eguneraketa integrala adierazten du. Kalitate handiagoko zerbitzu publikoa eskaintzeko lanean ari gara, digitalizazioa, jasangarritasuna, ondarearen errespetua eta irisgarritasun handiena barne hartzen dituena", gaineratu du.

Hobekuntza horiekin, hilerriak modernizatzeaz gain, Bilboko Udalak herritarren ongizatearekiko konpromisoa sendotu du, "duinak, eraginkorrak eta sakonki gizatiarrak diren memoria eta oroimenerako espazioak eskainiz".

Bizkaiko Aldizkari Ofizialak uda honetan argitaratu du araudi berriaren hasierako onespena jendaurrean jartzeko iragarkia, herritarrek aztertu eta egoki iritzitako alegazio, erreklamazio edo iradokizunak egin ditzaten abuztuaren 4tik irailaren 16ra bitartean, biak barne.