Iparraldearekin lankidetza indartzeko 'Ideiak' herritarren proiektuen deialdi berria egin du Gipuzkoako Aldundiak

Gipuzkoako Foru Aldundiaren gobernu kontseiluak Ideiak 2025 - Mugaz gaindiko herritar proiektuak deialdia onartu du. 2022tik abian dagoen ekimenaren helburua da mugaren bi aldeetako erakundeen eta herritarren arteko lankidetza indartzea, Gipuzkoaren, Lapurdiren, Nafarroa Beherearen eta Zuberoaren artean ongizatea, kultura eta kohesio soziala sustatuko duten proiektu bateratuen alde eginez.

Irune Berasaluze foru erakundearen bozeramaileak azaldu du edizio berri honetan Ideiak programak "aurrerapauso bat" ematen duela eta "laguntzen deialdi" bihurtzen dela, aurreko edizioetan erabilitako proiektuen bozketa sistema atzean utzita.

Horrekin, esan duenez, "elkarteei eta kolektiboei protagonismo eta ekimen handiagoa eman nahi zaie, mugaz gaindiko eremuan lotura sendo eta iraunkorrak eraikitzerako orduan duten funtsezko zeregina aitortuz".

Deialdiak 150.000 euroko zuzkidura ekonomikoa izango du berriro, eta proiektu bakoitzeko 20.000 eurorainoko laguntzak izango dira. Proposamenak Gipuzkoako eta Pirinio Atlantikoetako eragileek batera aurkeztu beharko dituzte, edo mugaren bi aldeetako kideak izan beharko dituzte taldean, Hego eta Ipar Euskal Herriko elkarte sarearen dinamismoa eta lankidetza indartzen jarraitu nahi baita.

EDIZIO BERRIA

Edizio honetako proiektuen hautaketa Gipuzkoako Aldundiaren ebaluazio batzorde batek egingo du, eta Pirinio Atlantikoetako departamentuko adituek ere parte hartuko dute.

'Ideiak' ekimenak 26 proiektu babestu ditu 2022an sortu zenetik, eta urtero 150.000 euroko inbertsioa egin du. Iaz zortzi ekimenek finantzaketa jaso zuten mugaz gaindiko aurrekontu parte hartzaileen esparruan.