Arnasguneek hizkuntza gutxituen biziberritzean duten garrantzia aztertuko dute urrian Azpeitian

Arnasguneek hizkuntza gutxituen biziberritzean duten garrantzia aztertzeko nazioarteko bilura egingo da Azpeitian (Gipuzkoa) urriaren 16an eta 17an, 'Arnasguneak hizkuntza gutxituen biziberritzean' izenburupean, UEMA Udalerri Euskaldunen Mankomunitateak, Soziolinguistika Klusterrak, UEU Udako Euskal Unibertsitateak eta Coppieters Fundazioak antolatuta.

Soziolinguistika Klusterreko iturriek jakinarazi dutenez, Euskal Herriko ikerlari eta adituekin batera, Eskozia, Gales, Kanada, Katalunia eta Hego Tiroleko hizlariak ere bilduko ditu konferentziak.

Topaketak bi helburu nagusi ditu: alde batetik, hizkuntza gutxituen biziberritze prozesuetan arnasguneek duten garrantzia aztertzea eta gogoeta piztea, eta, bestetik, hizkuntza gutxituen egoera soziolinguistikoa sendotzeko proposamen zehatzak eta neurriak partekatzea eta zabaltzea.

Bi egunetan zehar, hizlari esanguratsuek aurkezpenak, eztabaidak eta mahai inguruak egingo dituzte, arnasguneen inguruko ikuspegiak eta esperientziak elkarbanatuz. Gaiari ikuspegi askotatik helduko zaio, besteak beste, dinamika soziolinguistikoa, demografia, hizkuntza politika, garapen sozioekonomikoa, kulturgintza, lege babesa eta hiztunen ahalduntzea aztertuz.

Bilkura Azpeitian egingo da, hau da, euskararen erabileragatik eta hizkuntzaren indar sozialagatik arnasgune gisa hartzen den herrian, eta "aukera bikaina" eskainiko du hizkuntza komunitate desberdinetako errealitateak eta esperientziak gertutik ezagutzeko, hizkuntza gutxituen etorkizunari begira ekarpen praktikoak eginez.

Ekitaldiaren antolatzaileek azpimarratu dute hizkuntza gutxituen egoera soziolinguistikoa indartzeko estrategia eraginkorren premia dela-eta arnasguneen garrantzia handia dela biziberritze prozesuetan.

Horregatik, bilkura hizkuntza gutxituen mundu mailako erreferentziazko topagune bilakatu nahi dute, esperientzien eta proposamenen trukea sustatuz. Konferentzian parte hartzeko aukera dagoeneko zabalik dago (www.labur.eus/arnasguneak-konf).