Donostiako Udalak udako kirol jardueren 'UDA-25' kanpaina antolatu du Donostia Kirolaren bitartez, ekainaren 23tik irailaren 7ra, ekimenean parte hartzen duten hiriko 31 kirol erakundeek prestaturiko jardueren eskaintza zabalarekin, eta aurreinskripzioa datorren astean egin ahal izango da, astelehenetik ostegunera, maiatzaren 5etik 8ra.
Donostiako Udaletik jakinarazi dutenez, eskaintza bi talde handitan banatu da: 16 urte arteko ikasleei zuzendutako jarduerak, eta gazteei eta helduei zuzendutakoak.
Kanpainan gehien eskatzen diren jarduerak kirol anitzekoak, surfa, igeriketa, tenisa eta piraguismoa izaten dira. Logikoa denez, itsasoarekin egindako jarduerek, hala nola surfak, bodyboardek, SUPek eta abarrek ere, eskari handia izaten dute garai honetan, parte hartzaile guztien laurdena bilduta.
Izen-emateari dagokionez, azken urteetako sistema mantendu da, bi fase desberdinekin. Hasteko, aurretiko izen-ematea maiatzaren 5etik 8ra egingo da, biak barne. Fase honetan, pertsona bakoitzeko aurreinskripzio bakarra onartuko da ikastaro berean, baina pertsona berak lau ikastaro desberdinetan eman ahal izango du izena gehienez.
Taldean ere egin ahal izango dira aurreinskripzioak, eta gehienez ere lau pertsona onartuko dira ikastaro bakoitzerako. Taldeko aurreinskripzio horiek zenbaki bakarrarekin hartuko dute parte zozketan, eta horren emaitzak berdin lotuko ditu taldeko kide guztiak.
Aurreinskripzioak www.donostiakirola.eus webgunearen bidez egitea gomendatu dute, nahiz eta zerbitzua ezarri duten erakundeetan ere aurrez-aurre egin ahal izango diren. Aurreinskripzio guztiek maiatzaren 9an egingo den zozketan parte hartuko dute, eta astebeteko epea izango dute ordainketa egin eta izena eman dutela baieztatzeko.
Izen-ematearen bigarren fasea maiatzaren 26an hasiko da, eta egun horretatik aurrera zuzenean eman ahal izango da izena leku libreak dauden ikastaroetan. Zuzeneko inskripzio hori ere sarean egin ahal izango da, ww.donostiakirola.eus webgunearen bidez, edota aurrez aurre klub eta erakunde antolatzaileen bulegoetan.
