Udal etxebizitza tasatuen ordenantza eguneratzea onetsi du Donostiako Udalak

Donostiako Udaleko gobernu bilerak udal etxebizitza tasatuak arautzeko ordenantzaren proiektua onartu du astearte honetan, eta udalbatzatik igaro eta jendaurrean jarri beharko da behin betiko onartu aurretik.

Eneko Goia alkateak azaldu duenez, "Donostian bagenuen udal etxebizitza tasatuen ordenantza bat, 2007koa. Ordutik hona hainbat arau sortu dira, eta, horien arabera, ordenantza hori eguneratu eta egokitu egin behar da, batez ere Etxebizitzaren Euskal Legearen alderdi batzuengatik".

Dokumentu berrian egokituko den alderdirik garrantzitsuena etxebizitzak esleitzeko modua da. Orain arte indarrean egon den ordenantzan zozketa erabiltzen zen, eta Etxebizitzaren Legetik esleipenak eskaeren baremazio baten bidez egin behar dira (baremazioan puntuak esleitzen dira familiaren diru sarreren, kide kopuruaren, antzinatasunaren eta beste inguruabar pertsonal batzuen arabera, hala nola desgaitasuna, guraso bakarreko familiak eta abar).

Aldatzen den beste alderdi bat etxebizitzak azalera eskubidean edo jabetza osoan lagatzeko aukera da, egungo araudiak mugatzen duena, alegia. Hori dela eta, udal ordenantzaren testu berri bat idatzi da, aurrekoaren egitura eta testu gehiena errespetatzen dituena, eguneratu eta bultzatzeko asmoz.

Goiak gogorarazi duenez, "udalaren asmoa da horrelako udal etxebizitza tasatuak bultzatzea eta garatzea datozen hiri garapen berrietan, etxebizitza sozialetarako derrigorrezko erreserbez gain".

"Udal etxebizitza tasatu horien hartzailea erdi mailako klasea da, batzuetan etxebizitza politiketan ahaztuta dagoena; izan ere, alde batetik, etxebizitza sozialetik kanpo geratzen dira, baina, bestetik, ez dira merkatu librera iristen. Hori da gure helburua, biztanleriaren maila gehienetara iristea, herritar guztiei etxebizitza babestu bat eskaintzea, erabiltzaileen diru sarreren araberako prezio desberdinekin", azaldu du Goiak.

Donostiako Udalaren arabera, etxebizitza tasatuak etxebizitza sozialaren eta merkatu librearen erdibidean daude. Normalean, titularrak berak saltzeko eta erabiltzeko dira, baina betirako babestuta daude, eta saltzen badira, administrazioari eskaini behar zaizkio eta prezioa ofiziala izango da beti.

Horrela, udal etxebizitza tasatuarekin etxebizitza asko merkatura daitezke prezio mugatu eta eskuragarrian, lurzoruaren eta urbanizazioaren kostuak estaliz eta espekulazioa eragotziz. Horregatik, Donostiako Udalak beharrezkotzat jo du udal etxebizitza tasatuen arauketa eguneratzea eta biziberritzea.