Jennifer Lopez artista estatubatuarrak uztailaren 16an Barakaldoko (Bizkaia) BEC erakusketa gunean eskainiko duen kontzerturako sarrerak apirilaren 16an jarriko dira salgai, 12:00etan, enterticket.es webgunean.
Aurretik, apirilaren 14an eta 15ean, soilik Santander bankuko bezeroei zuzendutako aurretiko salmenta jarriko da martxan santanderSmusic.com web orrian, 12:00etan, Last Tour enpresak jakinarazi duenez.
Jennifer Lopez 'Up All Night Live 2025' izeneko nazioarteko biraren baitan helduko da uztailean Euskal Herrira, eta bere ibilbideko "arrakasta ikonikoenak" interpretatuko ditu.
"Gure garaiko artistarik eraginkorrenetakoa" den Jennifer Lopezek 80 milioi disko baino gehiago saldu, 15.000 milioi erreprodukzio baino gehiago pilatu eta Spotify plataforman hilean ia 28 milioi entzule ditu.
Bestalde, Bilboko Udalak antolatutako BAS Bilbao Arte Sakro jaialdia ospatuko da Bizkaio hiriburuko Gizakunde elizan ostegunetik datorren astelehenera, apirilaren 10etik 14ra, 'Mirespena' izenburupean, eta bost kontzertu eskainiko ditu, antolakuntzak jakinarazi duenez.
Emanaldi bakoitzerako 10 euro ordaindu beharko dira, eta Arriaga Antzokiko leihatiletan eta www.teatroarriaga.eus eta musika-musica.bilbao.eus webguneetan salduko dira sarrerak, baita elizan bertan ere, kontzertu bakoitza baino 30 minutu lehenago. Saio guztiak 19:30ean hasiko dira.
Bada, La Ritirata taldeak 'Maitasun mistikoa' kontzertuarekin hasiko du zikloa ostegunean, apirilaren 10ean, eta Duron, Torres, Hidalgo, Cabanilles edo Sances bezalako Barrokoko musikari espainiar eta italiarren errepertorioa eskainiko du. Josetxu Obregonek zuzendutako kontzertuan Beatriz Oleaga mezzosopranoa eta Manuela Velasco aktorea izango dira.
Ostiralean, apirilaren 11n, Giovanni Pierluigi da Palestrinaren jaiotzaren 500. urteurrenarekin bat eginez, The Tallis Scholars talde britainiarrak konpositore italiarraren gutxi ezagutzen den meza bat eta moteterik onenetako bat interpretatuko ditu. Halaber, errepertorioari Orlandus Lassusen zenbait obra gehituko dizkio, Peter Phillipsen gidaritzapean.
London Handel Players taldeak jarraituko du jaialdia larunbatean, apirilaren 12an, J.S. Bachen kantata erlijiosoei eskainitako programarekin. Jessica Cale sopranoa, Merce Bruguera Abello mezzosopranoa, Benedict Munden tenorra eta Tristan Hambleton baxua ere ariko dira.
Igandean, apirilaren 13an, Bilboko Koral Elkarteak 'Valentin María de Zubiaurre (1837 - 1914) - Durangoko San Antonio komenturako musika' proiektua aurkeztuko du, musikari bizkaitarrak komentuko komunitatearentzat konposatu zuen lan argitaragabeari balioa emanez.
