AEK-Korrikak eta Mirokutana ekoiztetxeak 'Jalgi hadi!' dokumentalerako dirua biltzeko kanpaina abiatu dute

AEK-Korrikak eta Mirokutana ekoiztetxeak 'Jalgi hadi!' dokumentalerako finantzateka kolektiboko kanpaina bat jarri dute martxan, "euskararen bihotza eta burua proiektu batean elkartzeko asmoz".

AEK-Korrikako iturriek prentsa ohar bidez jakinarazi dutenez, euskararen aldeko lasterketa erraldoia barrutik ezagutzeko aukera eskainiko du dokumentalak.

"Batetik, ekimena posible egiten duen taldeari jarraitu eta bidean sortzen diren kezka eta arazoei elkarrekin aurre egingo diegu, Korrikaren emozioa lehen pertsonan bizitzeko; bestetik, filma hainbaten topagune bihurtuko dugu: soziologo, antropologo, hizkuntzalari, kulturgile, politikari eta beste hamaika euskaltzale. Elkarrizketen bitartez, euskararen iraganaz, orainaz eta etorkizunaz hitz egingo dugu", azaldu dute.

Nabarmendu dute dokumentala "euskara maite duen edonorentzat" egiten ari direla, eta, beraz, https://eu.goteo.org/project/jalgi-hadi-dokumentala web orrian sartu eta dirua biltzeko kanpainan laguntzera animatu dute. Poltsiko guztietarako moduko diru ekarpenak egin daitezke, 20 eurotik hasita, eta epea apirilaren 25ean amaituko da.

Bestalde, Mendi Tour Vital Fundazioa zikloaren 13. edizioak BBK Mendi Film Bilbao Bizkaia nazioarteko jaialdiko film onenen aukeraketa bat eskainiko du Gasteizen astelehen honetatik ostiralera, martxoaren 24tik 28ra.

Hain zuzen, antolatzaileek jakinarazi dutenez, 2024ko Mendi Film jaialditik aukeratutako alpinismo, eskalada, muturreko eski, nabigazio, highline eta dantza bertikalari buruzko 11 film proiektatuko dira.

Horrela, ikusgai izango diren lanen artean daude 'The Last Expedition', Wanda Rutkiewicz alpinista poloniar ospetsuaren bizitza eta desagerpena kontatzen duena; 'Ashima', Ashima Shiraishi neskato eskalatzailea protagonista duena, edota Xavier eta Victor de le Rue izarrek lehenaren alabarekin batera egindako 'Of a Lifetime'.

Emanaldiak Vital Fundazioaren Kulturunean izango dira, Gasteizen, 19:30ean hasita, eta saio bakoitzerako sarrerak 5 euro balio du.