Osakidetzak osasun profesionalei zuzendutako Genero indarkeriaren biktima diren seme-alaben aurrean jarduteko osasun arloko profesionalentzako gida dokumentua plazaratu du. Gida adingabeak hobeto artatzeko eta babesteko sortu da, haien ingurunean genero indarkeriako egoera bat bizi dutenean.

Euskalduna Bilbao jauregian egindako Genero indarkeriaren biktima diren alabak eta semeak jardunaldian aurkeztu du gida Osakidetzak, eta tresna gisa erabiltzeko proposatu du, genero indarkeriaren biktima diren seme-alabak artatzen dituzten osasun profesionalentzat, jarduteko jarraibideak eta protokoloak eskura ditzaten.

Osakidetzaren arabera, osasun sistema genero indarkeriaren kasu asko artatzeko lehen atea da. Euskadin, Osakidetzako larrialdietako eta osasun zentroetako profesionalek genero indarkeriaren biktima diren 2.055 emakume artatu zituzten 2023an, hau da, %22,6 gehiago osasun eremuan aurreko urtean erregistratutako genero indarkeriaren zifrekin alderatuta.

Gotzone Sagardui Eusko Jaurlaritzako jarduneko Osasun sailburuak egindako jauzi kualitatiboa aipatu du jardunaldian, gaur egun adingabeak ere indarkeria horren biktima gisa aitortzen direla eta tratatzen direla ikusita. "Osasun politikak ere horren parte dira", esan du.

Azaldu duenez, gida berrian, "indarkeria bikarioa bezalako alderdiak biltzen dira, eta azaltzen da zergatik den garrantzitsua gure osasun zerbitzuek detekzio goiztiarra aktibatzea eta nola planteatu behar diren esku hartzeko eta laguntzeko gomendioak".

Gida oso garrantzitsua dela nabarmendu du, eta bere helburua dela Osakidetzako osasun profesionalei gomendioak eta ezagutza ematea, "haien jardun indibiduala zein lankidetzazkoa hobetzen jarraitu ahal izateko, biktima horientzako arreta integrala hobetze aldera".