Hiri Antolamenduko Plan Orokor berriaren izapidetze-prozesuak indarrean sartzea ahalbidetuko duen onarpen-prozesua osatu ahal izateko babesa lortu du. PSE-EAJren Gobernuak Elkarrekin Podemosekin lortutako akordioari esker, hiriko maila handieneko hirigintza-dokumentuak oraindik gainditzeke dituen bi faseetan beharrezko babesa lor dezake. “Gaurkoa egun handia da Vitoria-Gasteizentzat. Bi hamarkada zain eman ondoren, esan dezakegu gure hiriak, azkenean, Hiri Antolamenduko Plan Orokor berria izango duela”, azaldu du Maider Etxebarriak, Gasteizko alkateak. Alkateak, Beatriz Artolazabal lehen alkateordearekin eta Borja Rodríguez Hirigintzako zinegotziarekin batera, hurrengo hamarkadan Gasteizko hazkundea bideratuko duen akordioa aurkeztu du. Bere hitzetan, plangintza horrek, “hiri atseginagoa, trinkoagoa eta gizakiaren eskalara egindako hiria eraikitzera bideratutako irizpideak” biltzen ditu.

Dokumentua 2023ko otsailean onartu zuten hasieran, eta alegazioak aurkeztu eta erantzun ondoren, behin-behineko onarpena jasotzeko beharrezko babesa izango du. Ondoren, behin betiko onarpena jaso eta “datorren urteko udan“ berretsiko dutela espero dute. Plan Orokor berriak Gasteizko hiri-bilbearen hazkundea ezarri du arau gisa. Hazkunde hori “barrura begira egingo da, lurzoru gehiago kontsumitu gabe, jarduera ekonomikoa bultzatzeko plangintza malgutuz eta jarduera-espazioak sortuz“, azpimarratu du Etxebarriak.

Bizitegiei dagokienez, auzo berriak osatzeko, 24.000 etxebizitza baino gehiago eraikiko dira eta, aldi berean, birgaikuntzaren aldeko apustua egiten jarraituko dute. Berritasun gisa, “hiriko gune jakin batzuetan eta hutsik denbora-tarte luzea daramaten lokaletan, beheko solairuan etxebizitzak egokitzeko aukera ireki dugu, baina baldintza batzuekin”, zehaztu du Etxebarriak.

Etxebizitzen eraikuntzari dagokionez, dokumentu berriak hiriguneko hiru esparru zehatzetan oinarritu da. Borja Rodriguezek zehaztu duenez, Ospitale plazan, “eremua berreskuratzeko eta berroneratzeko aukera emango da, lau maila eta atikoa dituzten eraikinekin“.

Lovaina plazaren eta Marianistas ikastetxearen inguruan, “edozein jarduera mugikortasunak ingurunean duen eraginari buruzko azterlana egitearekin lotuta egongo da nahitaez”. Jose Erbina kalean, tren-geltokiaren parean, eta Florida kaleko 53. zenbakian etxebizitzak eraikitzeko aukera ere desblokeatuta geratu da.