HABEk euskara irakatsiko die EAEko hiru espetxeetako presoei

Eusko Jaurlaritzako Berdintasun, Justizia eta Gizarte Politiketako Sailak Helduen Alfabetatze eta Berreuskalduntzerako Erakundearekin (HABE) akordio bat sinatu du, Euskal Autonomia Erkidegoko (EAE) hiru espetxeetan preso dauden pertsonei euskara irakasteko.

Jaurlaritzaren arabera, HABErekin sinatuko den hitzarmenak berariaz jasoko du euskara irakasteko ikastaroak berrantolatu, kontrolatu eta horien jarraipena egin eta ematea. Horretarako, akordioak 100.000 euroko ekarpen ekonomikoa ezartzen du 2024rako.

Akordioaren bidez, Berdintasun, Justizia eta Gizarte Politiketako Sailak euskal espetxe ereduaren esparruan ahalbidetzen duen prestakuntza zorro zabala indartu nahi du. Eredu horren azken helburua askatasunik ez duten pertsonen berreziketa eta gizarteratzea da.

Ildo horretan, Berdintasun, Justizia eta Gizarte Politiketako Sailak uste du presoek euskara jakiteak lagundu egiten duela esparru guztietan bergizarteratzen, bizi diren euskal gizartearen kulturaren zati garrantzitsu batera hurbiltzen baititu.

Lankidetza Erakundea

Bestalde, Nerea Melgosa Berdintasun, Justizia eta Gizarte Politiketako sailburuak eta Miren Elgarresta Emakundeko zuzendariak Emakumeen eta Gizonen Berdintasunerako Lankidetza Erakunde berriak aitortu dituzte Gasteizen egin den Soldata-berdintasunarekin konprometitutako enpresak jardunaldian. Datorren otsailaren 22an ospatuko den Soldata Berdintasunaren Europako Egunaren testuinguruan antolatuta da topaketa.

Aitortza berri horiekin, 150 euskal enpresak lortu dute jada bereizgarri hori, eta horrela, balioa eman zaio euren erakundeetan berdintasuna bultzatzeko konpromisoari. "Erakunde kolaboratzailearen figurak aukera ematen die enpresei sektoreko beste enpresa batzuetatik bereizteko, berdintasuna bultzatzeko erreferente izateko, pertsonen kudeaketa hobetzeko eta zerbitzu hobe bat eman ahal izateko", adierazi du Nerea Melgosa sailburuak.

Zigilu hori lortzeko, enpresek diagnostiko bat, berdintasunerako plan bat eta sexu-jazarpenaren eta sexuan oinarritutako jazarpenaren aurkako protokolo bat aurkeztu behar dituzte, eta, horrez gain, berdintasunean egindako ibilbidea egiaztatu behar dute. Egiaztatutako erakundeen ia erdiak (74) Bai Sarea Berdintasunaren aldeko Enpresen Sarean parte hartzen dute. Sare horretako zenbait entitatek (Bizkaia Bahía Gas, Satse eta Zubizarreta) soldata-arraila murrizteko egiten ari den lana aurkeztu dute jardunaldi honetan, konkretuki, soldata berdintasunean aurrera egiteko tresnei buruz aritu dira.

Nerea Melgosa sailburuak azpimarratu du gizonen eta emakumeen soldaten arteko aldea urteekin murriztu bada ere, 5.622 eurokoa dela gaur egun. "Gizonek, batez beste, 33.706 euro kobratzen dituzte urtero Euskadin, eta emakumeek 28.084 euro. Zalantzarik gabe, arrakala murrizteak eremu askotatik lan egitea eskatzen du, eta hor enpresek beren erakundeetan berdintasunaren egoera diagnostikatzeko eta esparru horretan aurrera egiten saiatzeko duten erantzukizuna funtsezkoa da".