Vitoria-Gasteiz Trail urriaren 1ean itzuliko da Gasteizko Mendietara, hiru urteko geldialdiaren ondoren. Ascentiumek eta Vital Fundazioak antolatzen duten proba hori distantzia bitan jokatuko da: bata 16 kilometrokoa da eta 600 metroko desnibel positiboa du, eta bestea, 26 kilometrokoa eta 1.260 metroko desnibel positibokoa. Vitoria-Gasteiz Trail-en XIII. edizioa trail running lehiaketen egutegira itzuli da, beste behin ere, Euskal Herriko mendi lasterketarik sendoena izateko.
Vital Fundazioak azaldu duenez, "probak ibilbide pribilegiatua du, Estadio Vital Fundaziotik (Cervantes ibilbidea 20, Vitoria-Gasteiz) irteten denetik Gasteizko Mendietaraino. Paisaia aparta eta paregabetik igarotzen da, hiria eta Armentia parkea inguratzen dituen Eraztun Berdean zehar. Gainera, proba Vitoria-Gasteizko udalerritik igarotzeaz gain, trail runner-ek Berrostegieta, Ariñez, Zumeltzu, Gometxa eta Armentiako administrazio-batzarretako paisaia berdeez gozatzeko aukera ere izango dute, Estadio Vital Fundazioaren aurrean egongo den abiapuntura itzuli aurretik", azaldu dute bertatik.
Proba honetarako dauden 800 dortsalak agortzea espero dute antolatzaileek. Zehaztu zutenez, parte-hartzaileen % 35etik gora lurraldetik kanpokoak dira; izan ere, Madrildik, Valentziatik, Bartzelonatik eta baita Kanariar Uharteetatik ere iristen dira. “Urtero, Vitoria-Gasteiz Trail-en parte hartzen duten guztiek probaren, hiriaren eta naturaz betetako ingurunearen oroitzapen bikaina izaten dute proba amaitzean”, nabarmendu zuten antolatzaileek.
"Gaur egun, trail probak gora egiten ari dira, gero eta jarraitzaile gehiago baitituzte mendi lasterketek. Beraz, Vitoria-Gasteiz Trail edizio hau jendetsuenetakoa izatea espero da, betiere proba aparta hau garatuko den lekuari zor zaion naturarekiko eta ingurune naturalarekiko errespetua kontuan hartuta".
