Osakidetzak, 2026ko lehen seihilekoan, Mangolsen Bidaiaren bigarren fasea abiaraziko du, haurren obesitatea prebenitzeko

Programa honetan, EAEko 450 familia inguruk parte hartzen dute gaur egun. Bigarren fasea 2026ko lehen seihilekoan abian jartzea aurreikusten da, tratamendua amaitu ondoren, haurrek lehen fasean landutako ohitura osasungarriei eusteko erronkari heltzeko, esku-hartzearen ondorengo urteetan atxikimendua gal ez dezaten. Gainera, alderdi emozionalak ere jorratzen ditu.

'Mangolsen Bidaiaren' fase berria garatzeko lanak sendotu egin du Euskal osasun zerbitzuak osasun-zentroetan haurren obesitateari heltzeko lehentasunezko tratamendu gisa asmatutako tresna hori, eta, hain zuzen ere, NAOS Estrategia Saria jaso berri du.

Sari horren helburua da obesitatearen eta transmititzen ez diren beste gaixotasun batzuen prebentzioa sustatzea da, elikadura osasungarria eta jarduera fisikoa egiteko ohitura sustatuz. Gizarte Eskubideen, Kontsumoaren eta 2030 Agendaren Ministerioko Elikagaien Segurtasunerako eta Nutriziorako Espainiako Agentziak urtero ematen du sari hori, estatu mailan puntako ekimenak saritzeko.

'Mangolsen Bidaia' 2021ean hasi zen zabaltzen Lehen Mailako Arretako sare osoan, biztanleriaren gehiegizko pisuaren arazoa konpontzen saiatzeko, 7 eta 14 urte bitarteko adingabeen % 35i eragiten baitio. Programa aitzindaria da Estatu osoan, jokoan oinarrituta dago eta oso emaitza onak lortu ditu.

Tratamendua jaso duten hiru adingabetik bik lortu dute beren osasun-egoera hobetzea lehen urtean, eta, beraz, Osakidetzak bigarren fasea prest izateko azken zereginetan dabil, paziente horiei laguntzeko ohitura osasungarriei bizitza osoan zehar eusten.