Gurutzetako ospitalea Espainiako Estatuko erreferente izendatu dute minbizi adrenokortikalaren tratamendurako

Osakidetzako Gurutzetako Unibertsitate Ospitaleak Erreferentziazko Zentro, Zerbitzu eta Unitate izendapena lortu du minbizi adrenokortikala tratatzeko. Gaixotasun endokrinoa da, oso prebalentzia txikikoa, aldakortasun kliniko handia du eta abordatze integrala eta arreta oso espezializatua eskatzen du.

Osakidetzatik jakinarazi dutenez, Espainiako Gobernuko Osasun Ministerioak lehen aldiz ireki du minbizi adrenokortikalaren tratamenduan erreferentziazko zentroak akreditatzeko deialdia, eta lehen izendapen honetan, bi erietxe bakarrik akreditatu dira: Gurutzetako Unibertsitate Ospitalea eta Madrilgo Gregorio Marañon Ospitalea.

Osakidetzaren arabera, akreditazioak aukera emango du goi mailako espezializazio diagnostiko edo terapeutikoko arreta eta goi teknologia behar duten pazienteak artatzeko. Hala, "izendapenak indartu egiten du Osakidetzak patologia konplexuetan eta prebalentzia txikikoetan espezializatutako arretarekin duen konpromisoa".

Minbizi adrenokortikala tumore gaizto bat da, eta guruin suprarrenalen azala erasaten du (guruin horiek organismoarentzat funtsezkoak diren hormonak sortzen dituzte). Bere intzidentzia oso txikia da, urtean milioi bat biztanleko bi kasu baino gutxiago baitaude helduetan, eta are gutxiago haurretan; horregatik, arreta oso espezializatua behar da.

Bere konplexutasunagatik, Erreferentziazko Zentro, Zerbitzu eta Unitate gisa egiaztatutako ospitaleetan tratatu behar da minbizi adrenokortikala, diziplina anitzeko taldeak eta baliabide espezializatuak baitituzte ahalik eta arreta onena bermatzeko.

Gaitzak aldakortasun kliniko handia du eta espezialitate anitzen koordinazioa eskatzen du, besteak beste, endokrinologia, onkologia, kirurgia, erradiologia, anatomia patologikoa eta kasuak kudeatzen dituen erizaintza.