EAJk irabaziko lituzke foru hauteskundeak Bizkaian batzarkide bat gehituz, eta EH Bilduk bat edo bi irabaziko lituzke

EAJk irabaziko lituzke berriro 2027an Bizkaiko Batzar Nagusietarako hauteskundeak 24 ordezkarirekin, 2023an baino bat gehiago, eta EH Bildu bigarren alderdia izango litzateke, 16 edo 17 batzarkiderekin, egun baino bat edo bi gehiago.

PSE-EEk ordezkari bat galduko luke, zazpirekin geratuz, eta PPk ere batzarkide bat gutxiago lortuko luke, bi izateko. Elkarrekin Podemosek egun dituen bi batzarkideetako bat mantendu edo ordezkaritza gal dezake, eta ordezkaritzarik ez duen Vox berdin manten daiteke edo bat irabazi lezake. Sumarrek ez luke ordezkaritzarik lortuko.

Bizkaiko Foru Aldundiak egin duen iritzi publikoaren azterketari dagokion hauteskunde prospekzioaren emaitzetako batzuk dira. Gizaker enpresak egindako lanak maiatzaren 25etik ekainaren 10era bitarte 18 urtetik gorako pertsonei telefonoz egindako 3.000 elkarrizketa bildu ditu.

Bada, inkestaren datuen arabera, EAJk berriro irabaziko luke, botoen %39,3rekin (2023an baino hamarren bat gehiago), eta 23 batzarkide izatetik 24 izatera igaroz. Bigarren postuan EH Bilduk jarraituko luke, bozen %29,5ekin, aurreko deialdian baino lau puntu gehiago; beraz, egungo 15 batzarkideetatik 16 edo 17ra igaroko litzateke.

PSE-EEk behera egingo luke botoen %13,8 eskuratuta (2023an %16,2), eta zazpi ordezkari lortu lituzke, bat gutxiago. PPk ere gal ditzake botoak, %8,4tik %6,6ra, eta hiru batzarkidetik bira igaro litzateke.

Elkarrekin Podemosek botoen %7,4 lortu zuen aurreko foru hauteskundeetan Podemos, Ezker Anitza-IU eta Equo Berdeak alderdiek eratutako koalizioan, eta oraingoan %3,7ra jaitsiko litzateke, ordezkari bakarrarekin edo ordezkaririk gabe geratuz.

Vox botoen %2tik %3,1era igoko litzateke, eta horrek batzarkide bat lortzea edo ordezkaririk gabe jarraitzea ekarriko luke. Sumar, bozen %2,3rekin, ez litzateke Bizkaiko Batzar Nagusietan sartuko.

Abstentzioa apur bat jaitsiko litzateke, Bizkaiko Batzar Nagusietarako 2023an geindako hauteskundeetako %39,9tik 2027an zenbatetsiko litzatekeen %38,7ra.

HAUTESKUNDE BARRUTIAK

Bestalde, hauteskunde barrutiei dagokienez, EAJk seina ordezkari lortuko lituzke Bilbon (bat gehiago), Busturia-Uriben eta Enkarterrin, eta bost Durango-Arratian, eta EH Bilduk bost lortuko lituzke Busturia-Uriben, launa Durango-Arratian eta Enkarterrin (bat gehiago) eta hiru edo lau Bilbon (berdin edo bat gehiago).

PSE-EEk batzarkide bat galduko luke Bilbon eta bi izango lituzke, eta gainerakoei eutsiko lieke Enkarterrin (hiru), Durango-Arratian (bat) eta Busturia-Uriben (bat). PPk eserleku bakarra lortuko luke Bilbon, orain duen bigarrena galduz, eta Busturia-Uribekoa mantenduko luke.

Azkenik, Elkarrekin Podemosek Bilboko barrutian duen batzarkide bakarra mantendu edo gal dezake, eta Voxek barruti berean bat lortu edo Bizkaiko Foru Ganberatik kanpo jarrai dezake.