Jaurlaritzak EAEko Trenbide Sarearen Lurralde Plan Sektoriala eguneratzeko prozedura hasi du

Susana Garcia Chueca Eusko Jaurlaritzako Mugikortasun Jasangarriaren sailburuak Euskal Autonomia Erkidegoko (EAE) Trenbide Sarearen Lurralde Plan Sektoriala berrikusteko eta egokitzeko prozedurari hasiera emango dion agindua sinatu du. Prozedura horren bidez, eta plan berria idatzi aurretik, beharrezkoa den informazio guztia jaso nahi da agintari publikoengandik, bai eta herritarrek prozesu horretan parte hartzea sustatu ere.

Hala, eta ildo horretatik jarraituz, Jaurlaritzak jakinarazi duenez, EAEko demografiaren, teknologiaren eta ingurumenaren erronkei erantzungo dien etorkizuneko trenbide azpiegitura diseinatze aldera, prozesuaren hasieratik informazioa bildu nahi du herritarrengandik, gizarte zibiletik eta sektore profesionaletik, hurrengo planaren idazketan haien ikuspegiak aintzat har daitezen.

Ildo beretik jarraituz, izatez, modu sozial eta parte hartzailean zehaztu nahi dira EAEko trenbide azpiegituraren eredu berriaren oinarriak, eta "plan berria erabilgarria, errealista eta adostua" izango dela bermatu.

Lurralde Plan Sektorialak antolamendu planak dira. EAEko Trenbide Sarearen kasuan, trenbide sarearen jarduna eta garapena zehazten du eta datozen urteetan trenbide azpiegituren eraikuntza bermatzeko lurzoru erreserbak ezartzen ditu, hirigintza plangintzak proiektu horiek kontuan hartzeko beharrarekin. Indarrean dagoen plana onartu zenetik 25 urte igaro direnean, plana berrikusi eta eguneratu behar da orain, ondorioztatu dute Eusko Jaurlaritzatik prentsa ohar baten bitartez.