Plan berria Abadiño uholdeetatik babesteko

Eusko Jaurlaritzako Industria, Trantsizio Energetiko eta Jasangarritasun Sailari atxikitako URA Uraren Euskal Agentziak urtarrilean lizitatuko du Ibaizabal ibaia uholdeetatik babesteko proiektuaren lehen fasea, Abadiño parean (Bizkaia), Laubideta eta Sarria ibaiak Ibaizabalekin bat egiten duen ingurunera arteko tartean, Traña-Matiena herrigunean.

URAk jakinarazi duenez, historikoki kaltebera izan den eremuan uholdeak izateko arriskua murrizteko beharrari erantzuten dio jarduerak, eta Kantauri Ekialdeko Demarkazio Hidrografikoaren Uholde Arriskua Kudeatzeko Planaren aurreikuspenen barruan sartzen da.

Plan horren lehentasunezko helburuak dira plangintza hidrologikoa lurralde antolamenduarekin eta babes zibileko planekin koordinatzea, urpean gera daitezkeen eremuen okupazioa saihestea, ibai inguruneak klima aldaketara egokitzea, uholde arriskua duten eremuetan bizi diren pertsonen segurtasuna handitzea eta aurrerantzean hiri garapen iraunkorragoa sustatzea.

Bada, Abadiño uholdeetatik babesteko proiektuaren lehen fasean Sarria ibaian aurreikusitako hiru esku hartzeetako bi sartzen dira (Sarria 1 eta Sarria 2 izenekoak), eta obra hidraulikoak egitea aurreikusten da ibilguaren ahalmen hidraulikoa hobetzeko, eta horrela gainezkatze arriskua murrizteko.

Jarduketaren aurrekontua 2,1 milioi eurokoa da (BEZ barne), eta, behin esleituta, 12 hilabeteko egikaritze epea dago; epe horretan, Abadiñoko Udalak eta URAk elkarrekin lan egiten jarraitu beharko dute.

Alderdi horri dagokionez, URAk bere gain hartuko du obren exekuzioa eta finantzaketa osoa, eta Abadiñoko Udalak beharrezkoak diren lurrak eskura jartzeko prozesua eta desjabetzeen ondoriozko kostuak ordaintzea.

Jarduketa bi erakundeek sinatutako lankidetza hitzarmenean zehaztu da. Akordioan lan programa bat ezarri zen datozen lau urteetarako, Traña-Matienan, Sarria eta Ibaizabal ibaien inguruan, uholde arriskua murrizteko zenbait jarduketa gauzatzeko, 6,3 milioi eurotik gorakoak, bi aldeek ordaindu beharrekoak.