Eusko Jaurlaritzako Elikadura, Landa Garapena, Nekazaritza eta Arrantza Sailak 46.000 euroko diru laguntza emango dio Eako Udalari (Bizkaia), portutik, Beletxe eraikinetik eta Kosallu baserritik datozen ur gris eta beltzak udal araztegira ponpatu eta bideratzeko lanak finantzatzeko.
Jarduketa horrekin amaituko dira gaur egun hondartza, itsadar eta portura iristen diren isuriak, eta horrela, kostaldeko ingurunearen kalitate ekologikoa, osasungarritasuna eta jasangarritasuna hobetuko dira.
Amaia Barredo Elikadura, Landa Garapena, Nekazaritza eta Arrantza nabarmendu duenez, "funtsezko lana da herriak itsasertz garbiago, seguruago eta jasangarriago bat izan dezan bermatzeko. Urrats erabakigarria da gure natur ondarea babesteko eta Eako herritarren bizi-kalitatea hobetzeko".
Proiektuak bi exekuzio fase ditu, guztira 157.937,90 euroko aurrekontuarekin (BEZ barne). Lehen fasean, ponpaketa eta kanalizazio sistema instalatuko da kaialdetik araztegira (110.795,48 euro), eta bigarrenean, berriz, Beletxe eraikina eta Kosallu baserria sare berrira konektatuko dira (47.142,42 euro).
Jaurlaritzaren diru laguntzak 2025ean gauzatuko diren lanak finantzatuko ditu, eta 2026ko martxoan amaituta egon beharko dira. Elikadura, Landa Garapena, Nekazaritza eta Arrantza Saileko Portu, Itsasoko Gai eta Kostaldeko Zuzendaritza izango da proiektuaren kudeaketa, jarraipen eta ikuskapenaren arduraduna.
HARREMANA
Lan horiekin, Eusko Jaurlaritzak portuaren eta hiriaren arteko harremana hobetzea sustatu nahi du, bai eta itsas ekonomiaren, kostaldeko ondarea babestearen eta kostaldeko komunitateen bizi kalitatea hobetzeko helburuetan aurrera jarraitu ere.
