Jaurlaritzak 13,65 milioi euro bideratuko ditu enpresen berrikuntza sustatzera hiru programen bidez

Eusko Jaurlaritzaren Industria, Trantsizio Energetiko eta Jasangarritasun Sailak 13,65 milioi euro bideratuko ditu aurten euskal enpresen berrikuntza sustatzera SPRI Taldeak kudeatzen dituen hiru programen bidez.

Hain zuzen ere, Fast Track Innobideak (apiriletik zabalik dago eta 10 milioi euro banatuko ditu), Hazinnova (2,7 milioi euro biltzen ditu eta maiatzaren 6tik irekita dago) eta BDIH Konexio (950.000 euroko aurrekontua du eta hurrengo asteotan irekiko da) dira hiru programak, SPRI Taldeak jakinarazi duenez.

Fast Track Innobideak programan eskaerak egiteko epea maiatzaren 20an itxiko da. Merkatuan ondasun edo zerbitzu berriak txertatu edo, lehiakorrago bihurtu ahal izateko, enpresan negozio prozesuak hobetuko dituzten heldutasun maila handiko berrikuntzako jarduerak bultzatuko ditu.

Enpresei laguntza integrala ematea da asmoa, ikertzaileen kostuen finantzaketatik hasi eta enpresa adituen aholkularitzaraino, berrikuntza prozesuaren fase guztiak arrakastaz gauzatu ahal izateko.

Laguntzak 250.000 euro artekoak izango dira proiektu bakoitzeko eta, aurtengo edizioan, finantzaketa jaso dezaketen proiektuen irismena handituko da; hala, berrikuntza proiektutzat joko dira I+G+B arloa nazioartekotzera eta emaitzak babestera eta baloratzera bideratutako metodologia guztiak.

Bestalde, Hazinnova programak aholkularitza eta laguntza eskainiko ditu berrikuntzako mikroproiektuak ezartzeko produktuan zein negozio prozesuan: fabrikazioa, logistika, merkaturatzea eta administrazioa eta finantzak.

Laguntzak espezietan emandako diru laguntzak izango dira (batez besteko prezioa 3.700 euro da), eta enpresa bakoitzak, gehienez, bi proiektu egin ahal izango ditu. SPRI Taldeak 500 eskaera inguru jasotzea espero du.

Programa aurrera eramateko, Innobasque Berrikuntzaren Euskal Agentziaren laguntza jaso da, eta bere helburua da laguntza ematea enpresei berrikuntza ez-teknologikoko proiektu txikiak abiaraz ditzaten euren antolakundeetan, proiektu horien bidez euren lehiakortasuna hobetzeko.

BDIK KONEXIO

Azkenik, eskaerak jasotzeko epea irekitzeko data zehatza oraindik baieztatzeke duen BDIK Konexio programaren bidez, Euskadiko manufaktura enpresek esperimentazioko eta testingeko azpiegiturara (BDIH) sarbidea izatea, horrekin lotzea eta ezagutzea bultzatuko da.

Robotika malgura, fabrikazio aditibora, zibersegurtasunera, makina adimendun eta konektatuetara, material aurreratuetara, sare elektriko digitaletara, gailu mediko eta osasun digitalera eta adimen artifizialera bideratuta dago.

Diru laguntzak gastuen % 80 artekoak izango dira. Pta proiektu bakoitzeko gehieneko zenbatekoa 20.000 eurokoa izango da eta enpresa bakoitzak bi eskaera aurkeztu ahal izango ditu gehienez. 125 eskaera inguru jasotzea aurreikusi dute.

Bestalde, Donostiako Udalak herritarren artean doan banatuko ditu azken hilabeteetan parke eta lorategietan egon diren lore eta landareen 30.000 ale inguru datorren astean.

Hiri Mantenimenduko udal zerbitzuek kendu egin dituzte lore eta landareok udaberrirako eta udarako egokiagoak diren beste espezie batzuekin ordezkatzeko, eta, "bigarren bizitza bat emateko" asmoz, doan emango dira, Donostiako Udaletik jakinarazi dutenez.