Jaurlaritzak mugikortasun jasangarriko esperientziak trukatuko ditu Alemania, Belgika eta Herbehereetan

Susana Garcia Chueca Eusko Jaurlaritzako Mugikortasun Jasangarriko sailburuak bidaia hasiko du Alemaniako, Belgikako eta Herbehereetara asteazkenean, martxoaren 19an, mugikortasun jasangarriko esperientziak trukatzeko eta herrialdeotan garraio publikoarekin lotuta gauzatutako ekimen berritzaileak bertatik bertara ezagutzeko.

Zehazki, Jaurlaritzako iturriek jakinarazi dutenez, Sara Barreal Mugikortasun Jasangarrirako Estrategiaren zuzendariarekin batera, Garcia Chuecak Aachen hiria bisitatuko du Alemaniako Ipar Renania-Westfalia estatuan, Maastricht Herbehereetako Linburgo probintzian, eta Lieja Belgikako Valonia eskualdean.

Horrela, asteazkenean, martxoaren 19an, mugaz gaindiko mugikortasunerako "funtsezko kokapena" duen Aachen hirian, sailburuak lan jardunaldi batean parte hartuko du Europako mugako beste bost herrialderekin batera -Frantzia, Eslovenia, Hungaria, Alemania eta Herbehereak-.

Topaketan, aldiriko bidaiarien trenbide garraio publikoa kudeatzen eta koordinatzen du Aachener Verkehrsverbund agentziako arduradunek hainbat herrialde inplikatzen dituzten mugikortasun esperientziak azalduko dizkiote Garcia Chuecari.

Esperientzia horien artean daude, besteak beste, Alemaniaren eta Herbehereen arteko txartel elkarreragileak edo Herbeherekin, Alemaniarekin eta Belgikarekin mugakide diren eskualdeek osatutako Euroeskualde Lurralde Lankidetzarako Europako Taldearen funtzionamendua. Helburua da garraioaren eta ingurumenaren arloetan mugaz gaindiko lankidetza sustatzea.

Era berean, Garcia Chuecak Aachen hiriko garraio publikoaren plangintza nolakoa den ezagutuko du, eta bertatik bertara ikusiko ditu herrialde desberdinen arteko trenbide garraio publikoaren alorreko proiektu berritzaileak.

Ostegunean, martxoaren 20an, sailburuak Lieja hiria bisitatuko du. Azken hamarkadan tranbia moderno bat ezarri du, eta laster bertan zabalkuntzak egitea aurreikusita dago.

Bisitan, Garcia Chuecak tranbiaren arduradunekin partekatuko du Euskadik arlo horretan duen ibilbide zabala, hala Bilbon nola Gasteizen, eta azpiegitura horietan abian jartzen ari diren berrikuntza eta digitalizazio proiektuak.

Mugaz gaindiko mugikortasun jasangarria sustatzeko Crosusmob proiektu europarrean sartzen da bidaia. Proiektu horretan, Euskadik Euskal Trenbide Sarearen bidez parte hartzen du bazkide nagusi gisa, Europako beste bost herrialdetako erakundeekin batera.