Aste honetan Iñigo Urkullu lehendakariak ziurtatu du Euskadi "giza eskubideekiko bereziki sentikorra eta konprometitua" dela, eta, gainera, munduko giza garapenaren indize handienetako bat duela. Iñigo Urkullu arduratu da “AHRI Conference 2023: Giza eskubideen defentsa begira-puntuan” deituriko nazioarteko biltzarra irekitzeaz. Egun hauetan egingo da, Deustuko Unibertsitatean, eta Nerea Melgosa sailburuarekin batera joan da.
Biltzarra Deustuko Unibertsitateko Pedro Arrupe Giza Eskubideen Institutuak antolatu du, Giza Eskubideen Institutuen Nazioarteko Elkartearen esparruan (AHRI, Association of Human Rights Institutes), eta egun hauetan Bilbon bilduko dira giza eskubideen defendatzaileen zeregina aztertuko duten arduradun instituzional, akademiko eta gizarte-eragileak.
Adituen foro honetan, lehendakariak gogora ekarri du Euskadik hainbat hamarkadatan jasan izan duen eskubide-urraketa “diktadura beltz eta luze batek eta terrorismoaren eta indarkeriaren zentzugabekeriaren eta bidegabekeriaren erasoen” ondorioz, eta ziurtatu du jarrera horiek ez dutela lekurik Euskadin, hala ere, “gaur ere —zehaztu du— prozesu ireki batean jarraitzen dugu, zauriak pixkanaka-pixkanaka sendatzen saiatuz”. Beste garai batzuetan bizi garela jakin arren, “inoiz ez dugu ahaztu behar pertsona batzuk dagoeneko ez daudela gure artean.
Bere ustez, urteetako "esperientzia beltz" horrek indartu egin du Euskadiren konpromisoa indarkeriarik ezari, printzipio eta balio etiko eta demokratikoei, defentsa aktiboari, babesari eta giza eskubideen berme eraginkorrari lotutako bizikidetza-ereduan.
Bere hitzaldiaren beste une batean, ohartarazi du munduan garai zailak bizi direla giza eskubideentzat, eta "inboluzio-arrisku erreal" baten berri eman du, eta salatu du Nikaraguako Gobernuak berriki itxi duela Erdialdeko Amerikako Unibertsitatea (UCA), Jesusen Lagundiak sortu eta gobernatua.
Azkenik, Iñigo Urkulluk eskerrak eman dizkio "munduan Giza Eskubideak defendatzeko, indartzeko eta bermatzeko ahalegin kolektiboari" nazioarteko konferentzia honek egindako "ekarpen apal baina bereziagatik”.
