Bost neurri, nazioarteko esperientzia dutenak

 “Arazoa dator bakardadea aukeratzen ez denean eta inposizio bat denean, eta, egoera kroniko bilakatu eta osasun fisikoan eta psikikoan inpaktu handia duenean”.

Nerea Melgosa Berdintasun, Justizia eta Gizarte Politiketako sailburuak, gaur, Topaketa: Bakardadeak topaketan parte hartu du, nahi gabeko bakardadeak detektatzeari eta haietan esku hartzeari buruzko jardunaldian. Gizarte-zerbitzuen eremuko erakunde, entitate eta eragileen arteko topaketen ziklo berria da. Topaketak Behatuz Gizarte Zerbitzuen Euskal Behatokiak antolatzen ditu.

Jardunaldia Bilboko Euskalduna Jauregian izan da, eta, Melgosarekin batera, Lide Amilibia Gizarte Politiketako sailburuordea eta Marian Olabarrieta Gizarte Zerbitzuen zuzendaria ere izan dira. Sailburuak nahi gabeko bakardade-egoera areagotu izana pandemian intentsifikatu den arazoa dela esan du, eta bereziki esanguratsua dela gizarte garatuetan, besteak beste, EAEkoan.

Era berean, sailburuak bost neurri proposatu ditu EAEn bakardadeari aurre egiteko: esperientzia eta ekimenen sare bat sortzea, bakardadearen modu guztiei helduko dien ikuspegi integrala hartzea, bakardadearen prebentzioan eta detekzio goiztiarrean eragitea, lotura komunitarioen modu berriak sendotu eta eraikitzea eta ikerketa sustatu eta ezagutza partekatzea.

Melgosak beste herrialde batzuen ebidentzian –besteak beste, Erresuma Batuen eta Japoniaren ebidentzian– oinarritzen diren jardunbide egokietatik eta politiketatik ikasteko beharra nabarmendu du, haiek bakardadearen aurka borrokatzeko ministerio bereziak sortu baitituzte. Gainera, nabarmendu duenez, Europako Batzordeak gizarte-arazo larritzat identifikatu du bakardadea, eta, hala, bada, estrategia bereziak eta eraginkorrak diseinatu behar dira.

 “Gure asmoa aurretik dauden ekimenetatik abiatzea da, eta tailer hau oinarrien dokumentu bat sortzeko aprobetxatzea”, esan du Melgosak. “Epe laburrera oinarri horien estrategia bat eraiki nahi dugu, aurretik dauden ekimenetan oinarritzen dena, baita Europa-mailan ere, eta abian diren foru- eta toki-estrategiekin bat datorrena".