Ruper Ordorika musikari eta abeslari oñatiarrak 2024. urteko Abadia Saria jasoko du ostegunean, irailaren 12an, Donostiako Tabakalera Kultura Garaikidearen Nazioarteko Zentroan egingo den ekitaldi batean.
Irune Berasaluze Gipuzkoako Foru Aldundiko bozeramaileak astearte honetan prentsa agerraldian azaldu duenez, hasieran Hendaiako Abadia jauregian egin behar zen aitortza ekitaldia, baina ostegunerako euri iragarpena dagoenez, lekua aldatzea erabaki dute.
Modu honetan, lau hamarkadatan zehar euskarazko kultur sorkuntzaren alde egindako "lan eta ekarpen handia" aitortuko zaio Ordorikari. "Bere musikarekin eta ahotsarekin muga berriak ireki dizkio euskal kantugintzari, unibertso propioa sortuz, beti euskaratik eta euskaraz", adierazi du.
Beste datu batzuk
Bestalde, Donostia Zinemaldiak, Tabakalera Kultura Garaikidearen Nazioarteko Zentroak eta Elias Querejeta Zine Eskolak Kabia ekimena sustatuko dute bigarren urtez. Talentu zinematografiko emergenteari eskainitako jardunaldia da, eta irailaren 23an egingo da.
Zehazkiago, bere sustatzaileek jakinarazi dutenez, Kabia bi jardueratan banatuko da Tabakalerako ikus-entzunezko laborategian: Kabia Gosaria (10:00etatik 12:00etara) eta Networking Kabia (19:00etatik 23:00etara).
Bi proposamenek mundu osoko zinema eskoletako ikasleen film laburren hautaketa bat biltzen duen Nest saileko filmetako ekipoak elkartuko dituzte Ikusmira Berriak egonaldi eta proiektu programako egoiliarrekin eta Tabakalerako komunitatearekin (Nokan hautatutako errealizadoreak eta Elias Querejeta Zine Eskolako ikasleak).
