Loiuko aireportura doan Lurraldebusen linea Mugi sistema sartuko da astelehenean

Loiuko aireportuarekin konektatzen duten Lurraldebusen linea Mugi sisteman sartuko da astelehenean, martxoaren 18an, eta bidaiaren kostua 17 eurotik 3,35 eurora pasako da Mugi txartel pertsonalizatuarekin. Linea horrek 350.000 erabiltzaile baino gehiago izan ditu 2023an.

Gipuzkoako Foru Aldunditik jakinarazi dutenez, dagoeneko Mugirekin eros daitezke astelehenerako eta hurrengo egunetarako txartelak, eta astelehenetik aurrera, berriz, txartelak autobusean bertan erosi ahal izango dira, Mugirekin ordainduta.

Mugi sisteman sartuta, linearen erabiltzaileek beherapen handiak lortuko dituzte txartelaren prezioan. Azahara Dominguez Mugikortasun, Turismo eta Lurralde Antolaketako foru diputatuak zehaztu duenez, "Donostiatik aireportura bidaiatzen duen pertsona batek, urtarrilean onartutako %50eko hobariekin, 3,35 euro ordainduko ditu Mugi txartel pertsonalizatuarekin eta 4,39 euro Mugi anonimoarekin. Mugi gabeko txartelak, berriz, 12,90 euro balioko du, egungo 17 euroen aldean".

Bestalde, Zarauztik Loiuko aireportura bidaiatzen dutenek 2,51 euro ordainduko dute Mugi txartel pertsonalizatuarekin, 3,28 euro Mugi anonimoarekin, eta 9,65 euro Mugirik gabe, egungo 14 euroen aldean.

Gainera, Debagoiena eta Debabarrena udalerrien eta Bizkaiko aireportuaren arteko bidaiak 1,94 euro balioko du Mugi pertsonalizatuarekin, 2,53 euro Mugi anonimoarekin eta 7,45 euro Mugirik gabe, egungo 12, 10 eta 8 euroen aldean, Arrasatetik, Bergaratik eta Eibartik, hurrenez hurren.

"Aireporturako linea Mugi sisteman sartuta, zerbitzu hori ez da berezitzat jotzen txartelak erosteari dagokionez. Beraz, jada ezin izango da bidaiatu erositako txartelari ez dagokion bidaietan, orain arte gertatzen zen bezala. Hilaren 18tik aurrera, txartela erosi den bidaia jakin horretarako soilik erabili ahal izango da, eta, ez bada horrela egiten, baliogabetu egin beharko da horretarako ezarritako epean", jakinarazi du foru diputatuak.

Loiuko aireportuko autobusa Mugi sisteman sartzearekin batera, pandemia garaian abian jarri zen Lurticket aplikazioa bertan behera geratuko da, eta, ondorioz, txartelak soilik eskuratu ahal izango dira leihatilan, autosalmentako makinetan, web orrian eta autobusean bertan Mugi txartelaren bidez.