Eusko Jaurlaritzako Hezkuntza Sailari atxikitako BCAM Basque Center for Applied Mathematics zentroak eta Deustuko Unibertsitateak lankidetza arlo ezberdinak biltzen dituen hitzarmena sinatu dute, elkarlan akademikoa eta zientifikoa bultzatzeko asmoz. Akordioak bi erakundeen arteko loturak indartuko ditu, eta helburu nagusia ikerketa sustatzea da, matematikan orokorrean eta matematika aplikatuan prestakuntza espezializatuan bereziki, bai eta talentua erakartzea ere.
Jose Antonio Lozano Alonso BCAM Basque Center for Applied Mathematics zentroko zuzendari zientifikoak eta Juan Jose Etxeberria Deustuko Unibertsitateko errektoreak izenpetu dute bi erakundeen arteko akordioa.
Bi erakundeek jakinarazi dutenez, hitzarmenaren bidez konpromisoa hartu dute beren eskumenekin bat datozen ikerketa proiektuetan aktiboki laguntzeko. Sinergia horren bidez, aurrera egin nahi da arlo partekatu interesgarrietan, matematika orokorrean eta matematika aplikatuan arreta jarriz.
Gainera, hitzarmenak barne hartzen du BCAMen eta Deustuko Unibertsitatearen arteko elkarrekiko aholkularitza, baita hirugarren erakundeei aholkularitza eskaintzeko prestutasuna ere, beharrezkoa denean.
Doktore tesien zuzendaritzakidetzan lankidetza ere ezarri dute, ikasleek bi erakundeen esperientzia eta ezagutza izan dezaten beren ikerketetan. Halaber, BCAMek eta Deustuko Unibertsitateak konpromisoa hartu dute gradu edo masterreko azken lanetarako gainbegiratze espezializatua eskaintzeko, eta ikasleei aukera emango diete beren arloetako adituen orientazioa jasotzeko.
Bestalde, talentua erakartzeko laguntza sustatuko dute, berariazko laguntza programen bidez: esparru akademikoan eta zientifikoan talentua erakartzeko eta atxikitzeko neurriak ezarriko dira.
Azkenik, bi erakundeek prestakuntza espezializatua ematen lagunduko dute, eta programa akademiko bateratuak, ikastaroak eta tailerrak antolatuko dituzte komunitate akademikoak elkarren artean aberasten laguntzeko.
