Kutxabankek 750 toki eskainiko ditu udako Gaztedi programako hizkuntza ikastaroetan

Kutxabank finantza erakundearen Gaztedi programak hizkuntza ikastaroen programa indartua eskainiko du 2024ko udan, 750 tokirekin. Atzerriko egonaldiak eta Tarazonako udalekuak dira gero eta lehenago kontratatzen diren aukerak, eta horregatik aurreratu da horien aurkezpena, erakundeak jakinarazi duenez.

AEBetan (Ekialdeko Kosta eta Kalifornia) familiako bi murgiltze programa eta Newcastlen (Ingalaterra) eta Corken (Irlanda) programa bana gehituko zaizkie aurten ohikoak diren atzerriko hizkuntza ikastaro eta programei, gai bereziak hautatzeko aukerarekin, hala nola futbola, STEAM, hipika, errugbia edo golfa. Alemaneko programan ere izango dira nobedadeak, Berlin izango baita helmuga berria.

Programak eta helmugak parte hartzaileen adinetara egokitu dira -11 eta 18 urte artean-. Ikastaro batzuk atzerrian lehen esperientzietarako gomendatzen dira, egonaldiak barnetegietan eta hurbilagoko tutoretzekin egiten baitira. Era berean, landa inguruneetan eta giro lasaiagoetan ere eskaintzen dira helmugak, eta esperientzia hiritarragoak ere beste helmuga batzuetan, adibidez Dublin, Brighton, Oxford edo Ingalaterra Berrian.

Aurten, Tarazonako udalekuetan astebeteko edo bi asteko egonaldiak egiteko aukera izango da. 8 eta 14 urte bitarteko haurrentzat dira eta, ingelesa ikasteaz eta praktikatzeaz gain, egoitzako egonaldiaz gozatuko dute futbol eta errugbi zelai, pilotaleku, saskibaloi kantxa, aire zabaleko igerileku, lorategi eta jolas aretoarekin.

Katalogoa erakundearen webgunean dago eskuragarri, eta Gaztedi kolektibokoek posta elektronikoz buletin bat ere jaso dute informazio guztiarekin.