Vitoria-Gasteizko Udalak, Arabako Foru Aldundiarekin lankidetzan, bederatzi bisoi europar askatu du Salburuan, gaur goizean. Ale horiek itxian hazi dira espeziea hazteko Estatuko programaren esparruan. Programa horren helburua da haragijale mehatxatu horren populazioa indartzea, Europako mendebaldean duen banaketa eremuan, gure lurraldea barne.

Askapenean Pascual Borja Vitoria-Gasteizko Udaleko Ingurumen Kudeaketako zinegotziak eta Amaia Barredo Jasangarritasun, Nekazaritza eta Ingurune Naturaleko foru diputatuak eta parte hartu dute.

Nobedade gisa, eta hazkuntza programaren barruan mugarri bat denez, Araban hiru bisoi kumaldi jaio dira aurten, eta ugaltze arrakasta hori lortu den lehen aldia da.

Pascual Borja zinegotziak azaldu duenez, “askatutako aleen biziraupenaren eta natura ingurunera egokitzearen emaitzak oso itxaropentsuak izaten ari dira. Alde horretatik, nabarmentzekoa da urtero detektatzen direla ale gazte berriak udalerrian, eta horrek berretsi egiten du ale horien ugalketa erregularra. Gainera, askatu ondoren urte askotan ingurune naturalean bizirik iraun duten aleak hauteman dira, eta horrek naturara ezin hobeto egokitzen direla erakusten du. Azpimarratu behar da biztanleriaren indartzeak epe luzeko proiektuak direla, normalean 10 urteko iraupenekoak gutxienez, baina orain arte lortutako emaitzen arabera, orain arte egindako ahaleginak norabide onean doaz“.

“Urte asko daramatzagu bisoi europarra berreskuratzeko programan lanean, espeziea itxian hazteko programa baten bidez. Programa horri esker, ale sortzaileak eman ditzakegu, eta askatutako aleen jarraipenean parte hartu, gaur bertan Salburuan askatzen ditugunen antzera. Espezie hori Araban kontserbatzeko eta egonkortzeko lanaren fruituak biltzen ari gara, gainera bisoi amerikarra kanpora ateratzeko ezarri ditugun neurriei esker, 2019tik ez baita haren presentzia egiaztatu”, zehaztu du Amaia Barredok.

Bisoi europarra galtzeko arriskuaren ‘egoera kritikoan’ katalogatuta dago, haren lehiakide handia den bisoi amerikarraren mehatxuaren aurrean. 1998. urteaz geroztik, bi erakundeak -aldundiak eta udalak- lankidetzan ari dira bisoi europarraren kontserbazio ekintzak egiten eta espezie exotiko inbaditzaile hori kontrolatzen, euren presentzia eta naturan ugaltzen ari zela detektatu zenetik. Hala ere, espezie hori kontserbatzeko lanen eta tranpa kanpaina arrakastatsuen ondorioz, esan dezakegu Araba bisoi amerikarrik gabeko lurraldea dela.

Populazioa indartzeko programa abian jarri zenetik, Foru Aldundiak eta Gasteizko Udalak bisoi europarraren 35 ale askatu dituzte Salburuan.

Najerilla, Samaniego, Nieves, Saldón, Sadaba edo Sarsol dira Salburuan itxian jaio eta askatutako aleen izenetako batzuk. Aleak, lau heldu eta bost kume (horien artean bi ama eta haien bi kumeak), abezedarioko letrekin bataiatzen dira, jaiotza urtearen arabera, hazkuntza programa hasi zenetik duela hogei urte jada.

Salburuan askatutako aleek, naturalizazio prozesu baten ondoren, eta Najerilla ibaian askatzen ari direnek Errioxan eta Aragoin, populazioa handitzen lagunduko dute Araban eta Ebro Garaian, espeziearen banaketa eremua oso zatikatuta baitago penintsulako iparraldean, bisoi amerikarraren presioagatik eta erasoagatik.