El Salvador hilerrian 704 nitxo hobetzeko lanak hasi dituzte

Gasteizko Udalak El Salvador udal-hilerriko 254. etxadian nitxoak konpontzeko eta ingurunea egokitzeko lanak hasi ditu gaur. Esku-hartze horri esker, 704 nitxotan egin ahal izango dira lanak, haien kontserbazio-egoera hobetzeko eta kanposantuko eremu horretan antzemandako hezetasun-arazoak konpontzeko.

Lanak Construcciones Laumora SL enpresari esleitu dizkiote 259.325,99 euroan, eta lau hilabeteko epea izango dute.

“Udal-hilerriaren mantentze-lanetan aurrera egiten jarraitzen dugu, eremu guztiak pixkanaka hobetzeko aukera ematen diguten jarduera planifikatuekin. Espazio zaindua, duina eta familientzako baldintza onetan dagoena bermatu nahi dugu”, adierazi du Beatriz Artolazabal Espazio Publikoaren eta Auzoen zinegotziak.

Azken urteetan nitxo horietan ikusi den narriadurari erantzuten dio jarduketak. Kalte horiek batez ere estalkietako inpermeabilizazio-arazoen ondorioz ura sartu izanak eragin ditu. Obrek aukera emango dute akats horiek zuzentzeko eta hezetasunari aurre egiteko babesa indartzeko, higaduran gehien eragiten duen faktoreetako bat baita.

Esku-hartzea 254. etxadian egingo da, hilerriaren ipar-ekialdean, Pilarreko Ama eta Karmengo Ama barruko kaleen artean. Fatxadetan, estalkietan eta erremate-elementuetan egingo dira lanak, eta inguruan ere hobekuntzak egingo dira, hobeto kontserbatzeko.

Proiektu berri horrekin, Udalak jarraipena emango die duela gutxi hilerriko beste eremu batzuetan egindako jarduketei; izan ere, dagoeneko 1.400 nitxo baino gehiago berritu dira 234. eta 244. etxadietan.