Toti Martinez de Lezeak eta Gasteizko Udal Musika Bandak bat egingo dute lehen aldiz asteartean

Toti Martinez de Lezea idazle gasteiztarrak eta Gasteizko Udal Musika Bandak bat egingo du lehen aldiz kontzertu berezi batean asteartean, apirilaren 21ean, 'Vitoria-Gasteiz hamar doinutan' izenburupean, Arabako hiriburuko Jesus Guridi Kontserbatorioko areto nagusian.

Sonia Diaz de Corcuera Gasteizko Udaleko Kultura zinegotziak aurkezpenean nabarmendu duenez, "parekorik ez duen proposamen honek tokiko historia uztartuko du Jesus Guridiren musika sinfonikoaren eta, Toti Martinez de Lezearen parte hartzeari esker, literaturaren bidez".

"Toti Martinez de Lezeak sortu ditu testuak, eta narratzaile gisa jardungo du topaketan. Plazerra da agertokian izen handiko idazle gasteiztar bat izatea, eta ziur nago zerbait magikoa sortuko duzuela", esan du.

Idazle gasteiztarrak azaldu duenez, kontzerturako idatzi dituen testuek "herrixka, gotorlekua, merkatarien hiribildua eta harrerako lurraldea izandako hiriaren historia kontatzen dute. Bertako biztanleek atsedenik gabe lan egin eta borrokatu zuten mendetan zehar, garai batean herrixka txiki zena gaur egungo hiri eder bihur dadin lortzeko".

"Kaleei izena eman zieten artisauei, jauregi eta elizen eraikitzaileei, musikari eta idazleei, eta beren historia, ohiturak, ibilbidea, pertsonaiak bizirik mantentzeko ahalegina egin zuten gizon-emakumeei egindako omenaldi xumea ere bada, haiek gabe zaila izango bailitzateke gu gaur hemen egotea: Micaela Portilla, Ernesto Garcia Fernandez, Iñaki Bazan, Rosario Porres, Iñaki Reguera, Fernandez de Pinedo, Diaz de Durana", azaldu du.

Jesus Guridiren 'Diez melodías vascas' enblematikoak izango dira kontzertuaren ardatza, eta, Luis Orduña kontzertuaren zuzendariaren arabera, "emanaldi honetarako espezifikoki sortutako literatur sorkuntzarekin hitz egingo dute". Errepertorioa Jose Uruñuelaren 'Maitea, nun zira?' lanarekin osatuko da.

BITARTEKARITZA KULTURALA

Gasteizo Udal Musika Bandak lantzen duen bitartekaritza kulturaleko ildoaren barruan kokatzen da kontzertua. Ildo horrek hiriko hainbat gizarte talderekin aldez aurretik egindako lana jasotzen du, "kontzertuaren edukira hurbiltzea erraztuz eta entzule aktibo gisa parte hartzea sustatuz".

"Horrekin, Udal Bandak indartu egingo du Gasteizko herritarrekin lotura estua duen praktika artistiko ireki eta inklusiboarekin duen konpromisoa, nabarmendu du Orduñak.

Lan honi esker, Bizan, Aspace, Itxaropena eta kaleko heziketarako programako 400 lagun izango dira kontzertuan. Edukiera bertaratu nahi duten eta gonbidapena lortu dituztenekin osatuko da; gonbidapenak Musiketxean jaso daitezke 09:30etik 21:00etara.